Back to Top
Responsive image
E korant di pueblo

Aruba ta eliminá toke de keda


September 2, 2021 • 2 minüt pa lesa

Promé Minister di Aruba, Evelyn Wever Croes, ta anunsiá ku e situashon
aktual na Aruba aun ta krítiko pero bou di kontròl

ORANJESTAD- Durante rueda di prensa, Gobièrnu demisionario di Aruba a anunsiá ku entrante 2 di sèptèmber lo suavisá algun medida mirando ku e kantidat di infekshon ku Covid-19 ta bahando.

Manera ya ta konosí dia 21 di ougùstùs 2021, Aruba a eskalá algun medida pa evitá ku Horacio Oduber Hospital (HOH) lo bai den krísis mas severo. For di e momentu ei promé Minister di Aruba, Evelyn Wever-Croes, a duna di konosé ku e medidanan lo keda na vigor te ku promé di sèptèmber 2021.

Aktualmente e situashon na Aruba pa loke ta trata Covid-19 aun ta krítiko, pero bou di kontròl, esaki Promé Minister i Dr. Casseres di HOH a anunsiá. Pa e motibu aki tim di krísis huntu ku Gobièrnu konhuntamente a yega na e desishon pa suavisá algun medida entrante 2 di sèptèmber 2021.



Hefe di Dienst Besmettelijke Ziektes (BDZ), Sharina Koolman, ta informá ku maske a skohe pa suavisá algun medida no ta nifiká ku e situashon lokal na Aruba ta manera outoridatnan ta deseá. Ademas, Koolman ta anunsiá ku e “positivity rate” na Aruba ainda ta haltu, prinsipalmente pasobra no ta tèst sufisiente.

Análisis konduktá pa loke ta trata kantidat di persona bakuná na Aruba ta mustra ku 28.5% di hóbennan entre 12 pa 17 aña ta kompletamente bakuná, 65.9% di personanan entre 18 pa 59 aña ta kompletamente bakuná i 76.4% di esnan 60+ ta kompletamente bakuná.

E porsentahe di bakunashon na Aruba ta relativamente bon, pero outoridatnan ta keda motivá esnan no bakuná pa hasi esaki. Datos pa loke ta hospitalisashon na Aruba ta mustra ku mayoria di esnan interná of ku a fayesé pa motibu di Covid-19 ta personanan no bakuná.

Segun Dr. Casseres di HOH, e kantidat di atmishon pa loke ta kuido regular di pashèntnan ku Covid-19 a kuminsá baha. Sinembargo, esaki aun no ta e kaso pa hospitalisashon ku kuido intensivo. Tambe Dr. Casseres ta informá ku maske a logra krea kapasidat pa 20 kama di kuido intensivo ku e personal adishonal ku Aruba a risibí for di Hulanda i Instituto Médiko San Nicolas (IMSAN), ainda tur dia tin pashènt ta keda transportá pa Colombia pa risibí kuido intensivo. Te ku ayera tabatin 19 persona interná den kuido intensivo na Aruba i un total di 21 persona a keda trasportá pa Colombia te ku awor.

Login