Gráfiko ilustrando ku e brote aktual a surpasá e kantidat máksimo
di infekshon ku Covid-19 ku Aruba a eksperensiá.

ORANJESTAD- Debí na e preshon inmenso ku kuido di pashèntnan infektá ku Covid-19 ta trese riba Horacio Oduber Hòspital (HOH) na Aruba, Gobièrnu di Aruba a eskalá medidanan pa evitá ku hòspital mester bati alarma i kanta kódigo pretu.

Durante rueda di prensa ekstraordinario ku a tuma lugá djasabra 21 di ougùstùs Promé Minister di Aruba, Evelyn Wever-Croes, a duna di konosé ku e situashon pa loke ta infekshon ku Covid-19 na Aruba ta unu sumamente preokupante. Ounke e kantidat diario di kasonan nobo ku infekshon ta baha tiki tiki, ainda no a logra baha e total bou di 1000 kaso aktivo. Aktualmente último sifranan publiká ta mustra un total di 1055 kaso aktivo.

Komparashon ta ilustrá ku e brote aktual, kousá pa e variante Delta, a surpasá e kantidat máksimo di e brote anterior na aprel, kousá pa e variante Alpha. E kantidat máksimo di kaso positivo den luna di aprel tabata 704, aktualmente 15 di ougùstùs Aruba a raportá 1084 kaso aktivo kual ta un rèkòrt te ku awor.

Konsekuensia di e kantidat haltu di kasonan di infekshon ku e vírus di Covid-19 ta un oumento drástiko di hospitalisashon. Motibu prinsipal pa e oumento den hospitalisashon ta ku aun no tin sufisiente persona bakuná.

E kantidat di persona hospitalisá desde promé di ougùstùs te ku djabièrnè 20 di ougùstùs ta forma un total di 83 persona. Di e personanan hospitalisá 23 ta rekerí kuido intensivo. Mirando ku e kapasidat di kuido intensivo na Aruba por akapará un máksimo di 9 pashènt i hermana islananan tampoko no tin espasio pa yuda tuma pashènt, Aruba a manda 14 pashènt Colombia pa risibí e kuido intensivo nesesario. Esaki ta ilustrá kon krítiko e situashon na hòspital ta aktualmente.

Horacio Oduber Hospital (HOH) na Aruba a anunsiá ku e nesesidat mas grandi ta personal. Pa e motibu aki hospital a hasi un yamada na tur spesialista pa laga nan trabou un banda i yuda ku kuido di esnan infektá severamente ku Covid-19. Konsekuensia di esaki ta ku operashon i tratamentunan na Aruba a para temporalmente pa por duna preferensia na esnan hòspitalisá ku Covid-19.

Ademas, outoridatnan di e hospital ta enfatisá ku aktualmente ainda e situashon ta bou di kòntròl i ku pueblo no mester drenta pániko ainda. Sinembargo, Promé Minister ta duna di konosé ku no lo dura largu promé ku yega e situashon di kódigo pretu na Aruba. Manera ya ta konosí esaki ta nifiká ku personal médiko lo mester skohe entre ken ta risibí tratamentu i ken no. Pa evitá ku HOH mester kanta kódigo pretu, Gobièrnu di Aruba huntu ku tim di krísis a eskalá medidanan pa prevení kontagio ku e variante Delta.

Entrante djadumingu 22 di ougùstùs, toke de keda di 10.00 pm te ku 5.00 am ta keda implementá. Ora di siere pa tur establesementu ta di 9.00pm te ku 5.00 am. Un máksimo di 4 persona por sinta huntu na mesa den restorant, paden i pafó; tur establesementu nokturno por akapará solamente hende sintá. No ta pèrmití aglomerashon. Bishita na kas, fiesta i enkuentro sosial ta prohibí. Komersio ta keda limitá na 50%, esaki ta enserá sinema, supermerkado, tienda, entiero i misa. Deporte ta keda limitá na training so, kompetensia no ta pèrmití.

Ademas, e medidanan ku ta na vigor kaba tambe ta keda aplikabel, kual ta uso di tapaboka obligatorio den establesementunan, distansia sosial i ta prohibí uso di alkohòl riba kaminda públiko.