ORANJESTAD – Ayera 20 di sèptèmber 2021 a tuma lugá e seremonia ofisial di huramentashon di e Gabinete nobo Wever-Croes II.

Durante un seno ameno den presensia di Gobernadó Interino di Aruba, Su Ekselensia  Yvonne Laclé-Dirksz e ocho ministernan di Gabinete Wever-Croes II a huramentá. E seremonia ofisial a tuma lugá den Kas Seremonial di Gobernadó. E obligashon di e ministernan pa huramentá promé ku aseptá nan puesto ta stipulá den artíkulo II.8 di Aruba su Konstitushon. 

E gabinete Arubiano nobo ta konsistí di un koalishon di partido MEP i partido RAIZ. E ocho ministernan ta konsistí di seis (6) pa partido MEP i dos (2) pa partido RAIZ. E koalishon nobo ta konta ku 4 minister eksistente durante gabinete Wever-Croes I i 4 kara nobo ku lo huramentá pa promé bes bou di gabinete Wever-Croes. 

E repartishon di kartera ta lo siguiente:

1. Minister di Asuntunan General (Promé Minister): Evelyne Wever-Croes 
2. Minister Integridat, Naturalesa, Transporte i kuido di Grandinan (Vise Promé Minister):  Ursell Arends 
3. Minister di Finansa i Kultura: Xiomara Maduro
4. Minister di Salú Públiko: Dangui Oduber
5. Minister di Asuntunan Ekonómiko: Geoffrey Wever
6. Minister di Hustisia: Rocco Tjon
7. Minister di Enseñansa i Deporte: Endy Croes 
8. Minister di Labor, Integrashon i Energia: Glenbert Croes