Back to Top
Vigilante banner image

Asamblea BIBANDO a tene su promé dos dianan di konsulta


May 12, 2021 • 2 minüt pa lesa

Willemstad – Djaluna, 10 di mei i djamars, 11 di mei, Gobièrnu di Kòrsou a organisá e Asamblea Nashonal ku ta karga e nòmber di ‘BIBANDO Perspectives’ kaminda tabata tin vários seshon di diálogo ku mas di 150 partisipante di diferente sektor pa duna e oportunidat di traha i proponé algun proposishon (resolushon) konkreto pa djabièrnè próksimo por hiba diálogo ku e tim di krísis riba dje. 

Temanan manera turismo, HORECA i Hospitalidat, edukashon i famia, entretenimentu, religion, deporte i fishinan ku ta bini den kontakto direkto ku e kliente i tambe empresa i ‘entrepreneurship’ a keda tratá. Kada seshon, a konta ku partisipashon di tantu stakeholdernan ku ta laborá diariamente den e diferente sektornan komo tambe e konsumidó ku ta hasi uso di e diferente servisionan. Di e forma akí a trata na krea e espasio pa nan mes deliberá i bini ku nan propio proposishonnan kon e sektor enkuestion lo por sigui funshoná mei mei di COVID-19 den futuro sin e nesesidat di kontinuamente mester eskalá i de-eskalá medidanan.

Tabata remarkabel durante e promé dos dianan, e diversidat di opinion, vishon i pensamentunan durante kada seshon; lokual na su turno netamente a hiba na krea perspektivanan muchu mas diverso i inklusivo pa futuro di nos pais. Durante e seshonnan tabatin partisipantenan ku kisas mas nesesidat pa ekspresá nan eksperensianan ku COVID-19 durante e aña tras di lomba, miéntras tambe tabatin esnan ku e deseo pa fiha riba futuro i kon pa sigui di awor padilanti. Bunita ta, ku tabatin e espasio pa kada granito konta den e resolushonnan proponé. Kisas no tur partisipante a sali for di e seshonnan ku e mesun sentimentu, pero pa Gobièrnu di Kòrsou tabata importante pa duna un bos netamente na esnan ku despues lo mester biba e resolushonnan ku a keda kreá i skucha kon nan mes ta mira ku nan sektor lo por sigui funshoná di forma mas duradero. E partisipashon di kada un ta nifiká, ku e perspektivanan kreá lo ta muchu mas faktibel pa kada sektor i e sentimentu di inklushon ta trese kuné tambe un kompromiso real pa ku e implementashon i preservashon di esakinan den futuro.

Na final di kada seshon, kada grupo mes a skohe dos partisipante ku djabièrnè 14 di mei próksimo lo bai dialogá riba e resolushonnan ku e Tim di Krísis den un seshon plenario. Pa medio di e representantenan akí, kada sektor lo tin e oportunidat pa nan mes presentá i deliberá huntu ku e Tim di Krísis pa asina a base di e aporte di miembronan di komunidat, Gobièrnu por logra yega na pasonan konkreto pa nos bunita isla por sigui pa dilanti mei mei di e retonan ku COVID-19 ta sigui trese kuné

Login