Cubaguaweg unda e kaso di asesinato a tuma lugá

Nieuwe Haven: Mañan   13 di yüli lo tin tratamentu di un kaso di asesinato ku a tuma lugá riba 25 di mart 2022 na Cubaguaweg

Tabata djabièrnè 25 di mart 2022 alrededor di 07.26’or ku  Sentral di Polis a risibí informashon di un kaso di tiramentu ku a tuma lugá den Cubaguaweg. Mesora a dirigí vários unidat na e sitio. Na yegada di e promé unidat, a bin topa un hòmber drumí abou ku diferente herida di bala i for di e momentu ei, e no tabata duna señal di bida.

For di investigashon preliminar ku polis a realisá na e sitio a sali na kla ku e hòmber aki lo mester tabatin interkambio di palabra ku un otro persona. Djis despues esei e hòmber aki a risibí un tiru for di un arma di kandela ku konsekuensia ku el a fayesé na e sitio mes. Na yegada di polis ya e sospechoso no tabata na e sitio mas. Dòkter di polis a konstatá morto di e víktima, un hòmber di nashonalidat hamaikino.  E viktima na bida tabata yama Jason Mclean

E mesun dia a sigui ku entrada hudisial na un kas den e bario di Julian na unda e sospechoso sa keda pero no a bin topa kuné. Dia 30 di mart si outoridatnan a bai na un kas riba Seru di Kandela na unda a bin topa ku e sospechoso. Tabata alrededor di 16.17’or e tim enkargá ku investigashon di kasonan di homisidio huntu ku RST i tim di Aresto a detené e hòmber sospechoso Garret Orainne Garricks ( 1986 ) nasé na Jamaica di 35 aña di edat. Detenshon a tuma lugá na un kas den kaya Florin. 

Durante di e detenshon a tene un entrada hudisial na e kas i a haña i konfiská un arma di kandela i artíkulonan ku ta di importansia pa e investigashon. 

Pues mañan e kaso aki lo keda tratá den su kontenido. Abogado mr. Dickens, lo ta e abogado ku lo hiba defenaa di e akusado.

 .