CUPECOY–  E asesino di Sabine Gousses, pareha di polítiko komersiante na St Maarten, Olivier Arrindell, a sali lòs bala riba e dama. Esaki segun deklarashonnan di Olivier den un programa na St. Maarten, “Late Night with Andrew Dick.

Segun e polítiko ku ta koriendo kampaña pa siguiente elekshon na St. Maarten e la risibi un yamada telefóniko pa bai buska algun dokumento. Arrindel no a spesifiká ki tipo di dokumento e la keda proponé pa tuma. Na promé instante esnan kende a ofresé e dokumentonan a puntr’é pa topa na French Quarter ku ta un bario na parti franses di e isla, pero segun Arrindel e la ninga.

E polítiko i lider di OMC na Isla Ariba, a ninga di bai French Quarter i proponé pa topa na e bario di CupeCoy na Low Lands ku tambe ta keda kasi na frontera ku Parti Franses pero na e otro banda di e isla. Segun Arrindel nan a topa ku e informante net den un bògt na entrada di e playa nudista na CupeCoy.

Nan a stashoná nan vehíkulo i na otro banda di kaminda. Un deskonosí den un jeep tambe a stashoná su vehíkulo, pero mas abou na entrada bayendo e playa nudista. Segun Arrindel tabata su pareha Sabine, kende a disidí di baha for di outo pa bai tuma e dokumento. Einan e asesino, mirando ku tabata Sabine a baha for di e outo a kana rònt di su jeep, dal su man duru kontra di e jeep i pasa kue su arma di kandela. Eseinan ta lokual Arrindel a duna den su deklarashon. Despues e asesino a kuminsá lòs bala dirigí riba e vehíkulo i Sabine a risibí un bala i kai den vehíkulo. Lawrence Lake, kende tambe tabata den e vehíkulo, a kubri e yu muhé di e pareha.  Arrindel den un deklarashonnan na e programa a duna di konosé ku e tambe a risibí un bala patras na su lomba ariba.

Nan a logra hui di CupeCoy koriendo di velòsidat haltu i yega den e área di hotèl na Maho unda Olivier a stashoná su outo. A keda konstatá ku Sabine a bin fayesé a konsekuensha di e herida nan di bala ku e la risibi. Segun Arrindel ta trata di un intento di asesinato polítiko.