Willemstad,– Segun e inmunológo Ashley Duits ta bisa ku a papia hopi kos basa riba teoria, pero tin algun otro punto importante.

E ta splika ku si wak mundialmente ta mira ku tin algun aspekto den realidat ku ta mustra kon potente e vakuna ta. Den e kuadro aki a tuma ehèmpel den paisnan manera Isreal i na Merka. “Nos mester realisá ku pa promé biaha den hopi tempu paisnan riku a keda afektá pa un pandemia. Te ku awor aki e úniko ku paisnan ku tabata haña problema ta den Karibe i Afrika, Awor aki a hinka asina tantu sèn pa aselerá e proseso pa yega na un vakuna i a logra”, asina dòkter Ashely Duits a splika ayera durante e rueda di prensa.

Den e mesun kuadro e ta bisa ku a sòru pa tur e seguridatnan ta na nan lugá. Dòkter Duits ta bisa ku nos por ta sigur ku e kalidat di e produkto ta garantisá si no e lo no a subi merkado te pa a keda usa.

E ta splika ku si nos wak e resultadonan di e vakunanan di Pfizer, ta mira ku un di e promé paisnan ku a usa e vakuna aki ta Israel. Israel a usa e vakuna aki for di 12 di desèmber 2020 i 70% di personanan riba 70 aña a tuma e vakuna i 16% di e poblashon total a hasi esaki.