WILLEMSTAD – E asosiashon formá pa profeshonalnan médiko kapasitá AMA, a reuní ayera tardi ku Javier Silvania den su funshon komo Minister di Salubridat, Medio Ambiente i Naturalesa (GMN). E mishon di AMA ta traha duru pa yunan di tera den sektor médiko regresá i traha pa nan pais.

E direktiva di AMA a hasi uso dje oportunidat pa ekspresá nan preokupashon tokante implementashon di e lei ‘Landsverordening normering topinkomens’ (LNT), ku tin na vigor for di desèmber aña pasá, relashoná ku regreso di yunan di tera médiko pa traha akí.

Direktiva AMA: “Desafortunadamente, introdushon di e legislashon LNT ta parse di ta un opstákulo adishonal den e sentido ei. Nos ta teme pa e konsekuensianan riba término largu ku esaki lo tin riba kuido médiko spesialisá na Kòrsou.” E reunion ku AMA a tuma lugá durante un seshon di konferensia di video ku e Minister.

Anteriormente ya direktiva di Curaçao Medical Center (CMC) a mustra riba e ‘problema grandi ku e lei akí ya ta okashonando’. “Dor di (e menasa dje aksisibilidat di) e LNT, CMC no por atraé spesialistanan nobo den servisio pa garantisá aksesibilidat i kontinuidat di kuido médiko. CMC a trata sí di yena diferente vakatura, pero e kandidatonan no tin interes mirando e plafòn ku ta konta konforme e LNT i e inseguridat mará na esaki.”

Konforme un amienda ku Parlamento a laga inkorporá den e lei, despues di tres aña lo kuminsá baha salarionan di funshonarionan i konseheronan den tòp di sektor públiko òf semi públiko, ku ta surpasá e stándar manera stipulá den e LNT. Segun e direktiva di CMC un kandidato-spesialista di wowo (yu di tera) a hala atras pa motibu dje LNT, siendo mester yena e funshon akí pa eliminá e lista di espera. Un kandidato-anestesista meskos, siendo mester yena e vakatura ei pa eliminá e retraso den operashonnan i pa sigurá anestesia general pafó di sirugia.

Un kandidato-nególogo (yu di tera) tambe lo a kuminsá traha na CMC pero te ainda ta mantené su mes pafó dje boto, siendo mester yena e vakatura akí pa e demanda di kuido króniko di por ehèmpel dialisá, ku tin di aber ku e kresementu di pashèntnan ku 10% pa aña. Un kandidato-radiólogo (yu di tera) a kita for di trabou den eksterior pa bin traha komo CMC, pero despues di a risibí informashon dje LNT a hala desishon aden i a disidí di no ke bin Kòrsou mas ainda. Siendo tin un eskases struktural di radiólogo, ku pa e motibu akí no por yena.

Un kandidato intensivista no ke drenta e boto miéntras tin menasa di aplikashon dje LNT. Mester yena e funshon akí pa e ‘ICU care closed format’. Un kantidato-spesialista-SEH a hala atras porlopronto pa motibu dje LNT, siendo mester yena e funshon akí pa yuda e kantidat di pashèntnan di SEH kresiente, loke ta e konsekuensia di un promé liña di kuido ku no ta funshoná optimal. Un kandidato-neorólogo ta wardando e desaroyonan relashoná ku LVT. E kandidato akí ta nesesario pa e demanda di kuido grandi (lista di espera largu). Un spesialista di pulmon ku tin diferente opshon no a skohe pa CMC pa motibu dje LNT.

Tin un grupo di speshalista di pulmon muchu chikí aworakí pa e demanda kresiente. Un spesialista di KNO di eksterior te ainda no ke skohe pa CMC, pa motibu dje LNT. Tin un eskases na e kantidat di spesialistanan di KNO tambe na CMC. Ademas denter di poko un kandidato lo stòp di traha. “E ehèmpelnan akí ta hasi kla ku no por ehekutá e ‘Capaciteitsplanning Gezondheidszorg Curaçao 2018-2019’, manera aprobá den desishon di Konseho di Ministernan di òktober 2018, pa motibu di (e menasa di aplikashon di) e LNT. Pa motibu dje LNT no por haña niun kandidato ku ta dispuesto na drenta servisio di CMC komo spesialistá pagá.”