Athena Sulvaran: Tratado Humanitario

Nieuwe Haven—E problema di menornan di edat riba lancha, siman pasá a keda ampliamente tratá den korte di hustisia na Kòrsou. Un grupo grandi di emigrantenan for di Venezuela tabata dilanti huesnan penal akusá di kontrabanda di hende.

E hóben abogado mr. Athena Sulvaran, a hiba defensa pa unu di e mamanan, Josmary Perozo Zambrano, kende a laga su yu hòmber menor di edat (6 aña) subi lancha ku su tata di kriansa, Ronald Martinez. Outoridat a bin arestá ámbos kanando den mondinan di Fuik 6 di sèptèmber último, despues ku 15 di nan a subi un lancha den oranan di mainta riba 5 di sèptèmber na Venezuela. Polis a kustodia e hobensito di 6 aña, Santiago i tene Martinez, miéntras e mama ku ya tabata na Kòrsou tambe a keda enkarselá pero rekobrá su libertat riba 17 di òktober.

Segun Athena Sulvaran, si tabatin un tratado humanitario, lo niun hende tabata sintá den sala di korte, akusando un mama desesperá di kontrabanda di hende. Josmary Perozo Zambrano, tabata un mama desesperá sin tabatin un solushon pa su yu. E hóben mama, kier a trese su yu Kòrsou via di e kanalnan ofisial, pero no a logra. Santiago di 6 aña tabata hiba un bida i hamber i miseria na Venezuela. Den e bario unda nan tabata biba, no tin awa saludabel miéntras Santiago no ta bayendo skol.

Segun Sulvaran, e kaso no ta nada diferente for di lokual ta pasando ku emigrantenan indokumenta rònt mundu. Na Oropa tin tratadonan humanitario pa kanselá e akusashonnan di kulpa riba kontrabanda di hende. Mester mira e problemátika mas grandi segun e abogado. “Kalke mama lo hasi meskos pa evitá mas sufrimentu di nan kriatura”. Segun e abogado, Zambrano no tabatin niun otro opshon sino purba krusa su yu pa un mihó bida pasobra lo mas pió tabata ward’é na Venezuela. E mama tabata den un situashon emergente i vital pa bida si su yu i ta opiná ku Korte na Kòrsou mester kambia nan vishon riba esaki, anke falta un tratado definí pa atendé e problemátika.

Santiago Perozo di 6 aña a subi lancha na Venezuela riba 5 di sèptèmber i yega Kòrsou den oranan di mainta tempran riba 6 di sèptèmber huntu ku 15 indokumentado mas, inkluso su tata di kriansa, Ronald Enrique Martinez.  Martinez ta tata di kriansa di Santiago kende tabatin un relashon ku su mama, Josmary Perozo Zambrano. E pareha entretantu ta separá, pero djarason último Ministerio Públiko durante tratamentu di nan kaso a demanda 3 luna di prizon.  Martinez kende ainda ta enkarselá a tuma e responsabilidat pa trese Santiagio Kòrsou. E la deklará ku e biaha tabata unu duru i nan mester a paga mil dòler pa kabes unda na Kòrsou ta paga e di dos mitar. E mama, Josmary su deklarashon tambe ta kuadra. E mama di Santiago, Josmary Perozo a splika ku na promé instante el a bisa ku tabata Martinez su idea pa trese su yu. Pero esei no tabata bèrdat sino ta un desishon ku nan a tuma huntu. Su yu, ta sufri di asma i alergia i na Venezuela no tin un solushon pe. Ayera e la splika su korte ku nan posibilidat ta limitá na Venezuela. Den nan bario no tin awa saludabel pa biba.

Hues mr Carmelia a rechasá e argumento ku Martinez i Perozo tabata den un situashon di emergensha. Korte a opiná ku ámbos akusado mester a pasa e trámitenan estatal legítimo pa trata na drenta Kòrsou. Nan hecho ta kastigabel, pero pa Martinez e la duna 3 luna di kastigu ménos su aresto preventivo miéntras pa mama Pedrozo e la duna 90 dia di enkarselashon kual 49 dia ta kondishonal. Santiago entretantu ta na Kòrsou, saludabel i bayendo skol.