CHOLOMA– Segun presidente di Amigu di Tera Yvette Raveneau,  tabata eksaktamente dos aña pasá a pone instanshanan na altura ku na Choloma ta sakando greis i yenando e burakunan ku shushi.

Esaki riba terenonan di gobièrnu den un área bunita di naturalesa. E tempu ei gobièrnu a hasi kaso i a pone algun bòrchi i a sera e entrada pa e mondi ku kadena. Awor akí kadena i bòrchinan no tei mas i atrobe di dia i anochi trùknan ta sali ku greis i drenta ku shushi kambiando un bunita área di naturalesa hasié un lèntfel.

Despues di kehonan insistente instanshanan a keda di enbolbí Xteam, e tim multidisiplinario kontra abusu ambiental, pa asina yega na un solushon. Probablemente e tim no a yega Choloma òf no a aktuá na un manera efektivo, pasobra e situashon ta saliendo kompletamente for di man, ku hopi molèster pa e hendenan ku ta biba den bisindario ku mester soportá holó stinki, muskita, molèster di trùk i katapila ku ta move di dia i anochi, i hendenan ku ta bin skòmbel den e bultonan di shushi.   

Loke ta sosodé na Choloma ta un ripitishon di Dam Pretu algun aña pasá. Despues ku instanshanan di gobièrnu a aktua i stòp e aktividatnan ilegal na Dam Pretu, dùmpmentu a muda bai Choloma. Ta un nogoshi tin, kaminda sistemátikamente katapila ta saka greis i tera fértil riba terenonan di gobièrnu i bende esaki, loke ta ladronisia. Despues trùknan ta gana plaka yenando e burakunan ku shushi ku mester a bai lèntfel. Kada tantu tempu katapila ta pusha e shushi pa traha lugá pa dùmp.