Wiels a deklará ku e no ta laga ningun hende daña su nòmber

Rio Canario – Relashoná ku e suseso ku a tuma lugá na Marnix College djamars último, riba ret sosial a surgi deklarashonnan ku entre otro ta kulpa Aubert Wiels di a duna òrdu na Polis pa listra alumno. Ayera den oranan di mainta, Aubert Wiels a akudí na Warda di Reshèrshe pa asina entrega keho di difamashon.

Manera ya ta konosí, djamars último den oranan di mainta a tuma lugá riba petishon di Marnix College un kontròl preventivo kondusí pa Kuerpo Polisial huntu ku Duana. E petishon pa kontròl ta bini di parti di e skol mes i esaki ta pa motibu ku den pasado a yega di haña alumnonan den posishon di droga, arma i/òf otro tipo di supstansha i ophetonan ilegal. Segun Aubert Wiels kende tambe ta forma parti di direktiva di Marnix College a splika ku e meta pa tene kontròlnan preventivo ta pa tene no solamente e alumnonan pero tambe dosentenan i tur persona ku ta traha na e skol den un ambiente sano.

Segun deklarashonnan hasí kontra di Aubert Wiels, alumnonan ta kulpa Wiels pa a duna òrdu na Polis pa listra algun di e alumnonan. Esaki Wiels a desmentí rotundamente. Segun Wiels, promé ku Polis a yega Marnix College, Wiels huntu ku e direktor di Marnix a reuní ku Kuerpo Polisial unda nan a duna splikashon amplio di e proseso di kontròl ku lo tuma lugá riba e dia enkuestion. Segun Wiels, e la risibí un lista for di su superior ku nòmber di alumnonan ku ta sospechá di ta envolví den asuntunan ilisito. E intenshon tabata pa saka esnan riba e lista i algun alumno mas pa un ‘grondige controle.’ Esaki tabata algu ku Wiels huntu ku direktor di Marnix a palabrá ku outoridatnan promé ku a inisiá e kontròlnan.

Segun Wiels, e informashon ku ta sirkulá tokante kitamentu di paña durante listramentu no ta kuadra. E la splika ku segun informashon ku Polis a duna, e alumnonan lo mester baha nan Karson te na un terser parti i nan lo mester ‘hurk’ dos bes. E prosedura aki ta un unu ku Polis ta hasi pa motibu ku a yega di haña alumno ku ta skonde supstanshanan ilegal den karson djabou. Si dado kaso e alumno ta den posishon di algu ilegal den su karson, na momentu ku e ‘hurk’ esaki lo kai. Pues, segun Wiels a deklará, e no sa nada di kitamentu di paña durante e listramentu.

Pa lokual ta trata e keho di difamashon, Wiels a splika ku e no ta laga ningun hende daña su nòmber i yam’é pedofil. E la splika ku e tin mas ku 18 aña den enseñansa hasiendo esaki korektamente. E la splika ku e deklarashonnan hasí kontra di dje ta bini for di alumnonan ku aña pasá nan a gara ku droga i mester a kita esakinan for di skol.