Minister Cooper kende a duna su sosten na e apertura di e drechamentu di Helmin Wiels Boulevard.

Willemstad,– Na fin di òktober 2022 tabata tin apertura di trabounan pa asfaltá Helmin Wiels Boulevard di nobo. Ya ta drenta e di dos luna ku ainda e trabounan pa drecha e kaya no por kuminsá.

Durante apertura di e trabounan, Randy van Aanholt di e kompania Aliansa a indiká ku e trabounan lo kuminsá riba 25 di òktober i ku e trabounan lo dura 20 dia. Lamentablemente debí na skarsedat i preis haltu di asfalt, gobièrnu di Kòrsou a indiká den un komunikado ku e trabounan a keda posponé te 14 di novèmber. Awe, 3 siman despues, ainda ningun trabou no a tuma lugá.

Minister Charles Cooper a indiká ku e rason pakiko no por a kuminsá riba 14 di novèmber tabata debí na e kantidat di áwaseru riba e último dianan. Mas aleu, mirando ku e trabounan lo dura alrededor di 20 dia ta nifiká ku a disidí pa posponé e trabounan te otro aña. Áwaseru kombiná ku sektor di konstrukshon sa tuma fakansi for di 16 di Dezèmber próksimo ta nifiká ku e trabounan a keda posponé. Minister Cooper no a duna un dia eksakto ki dia e trabounan ta planiá pa kuminsá otro aña, pues ta di keda pendiente riba reakshon di e minister di VVRP.

Durante apertura di e trabounan riba 24 di òktober, Minister Cooper a indiká públikamente na e kontratista ku gobièrnu lo aseptá solamente kaya di asfalt riba un forma di kalidat. Segun e minister, algun kaya no a wòrdu asfaltá riba un forma korekto e último tempu i esaki a kulminá ku algun kaya mester a wòrdu asfaltá di nobo riba kosto di e kontratista. Kayanan ku ta pendiente pa wòrdu asfaltá di nobo ta un parti di Nieuwe Haven ku ta situá entre Aqualectra i ofisina di Duana.