Asesinato di Boechi Windster ta karga e nòmber di kaso “Hummer”.

NIEUWE HAVEN,- Awe korte penal a plania henter dia pa trata e kaso di asesinato di e artista “Boechi” Windster.

Riba 9 di dezèmber 2022 Kòrsou a keda paralisá na momentu ku informashon a bini dilanti indikando ku e artista konosí Boechi a keda asesiná den área di Sta Maria. Tabata den oranan tempran di mardugá, ku sentral di polis a risibi notifikashon ku riba Rooseveltweg mester tabatin un kaso di tiroteo. Na yegada a bin nota un kurpa sin bida, ku despues a keda identifiká komo e hòmber artista di 30 aña, di fam Windster konosí komo “Boechi”.  Segun informashon, e artista a bin Kòrsou pa kumpli ku algun presentashon ku e tabata tin planiá den e luna di dezèmber 2022.

E siguiente dia di e asesinato, mesora outoridatnan a kuminsá ku interogashon di diferente sospechoso. E investigashon penal a sigui kana, kaminda riba 8 di aprel Ministerio Públiko a emití un komunikado indikando ku e promé aresto relashoná ku asesinato di “Boechi” a tuma lugá.

Pa tur su sorpesa e detenshon a tuma lugá na Hulanda i no na kòrsou. E komunikado a splika ku; djasabra 08 di aprel 2023 den oranan di mainta na Kòrsou den kuadro di e investigashon ‘Hummer’, reshèrshinan di DGC i na Hulanda e tim di asistensia hurídiko di reshèrshi nashonal (Landelijke Recherche) na Rotterdam a realisá diferente akshon. Un hòmber di inisial Churandi Coffie  di 44 aña a keda detené na Hulanda riba sospecho di su envolvimentu den e asesinato. Mesora despues a tene un entrada hudisial na e residensia kaminda e ta permanesé na Vlaardingen . Na Kòrsou tambe tres (3) entrada hudisial a tuma lugá den e barionan di Seru di Kandela, Noord Roozendaal i Mahuma. Aki ta trata di tres bibienda.  Esun na  Noord Roozendaal ta trata di Ceylonweg na unda e sospechoso lo mester tabata biba promé ku e bai Hulanda.

Algun dia despues riba 26 di aprel 2023 outoridatnan a detené un sospechoso mas kual ta e hòmber di 24 aña di edat, Christopher Zimmerman. Detenshon di e sospechoso  a tuma lugá den área di Mexicoweg. Durante di e detenshon a haña i konfiská un arma di kandela ku munishon. Despues di detenshon e Tim Divishon di Krímen Organisá a tene un entrada hudisial na kas di e akusado den Kaya Awaseru. Na e kas a haña i konfiská artíkulonan di importansia pa e investigashon.  For di investigashon ku a sigui a bin saka afó ku e sospechoso Christopher aki ta netamente aktu primu di e rèper ku a keda asesiná. 

Durante di e tratamentu ku tabatin  fiskal, mr Hato Willems a splika ku te ku 30 di Yüni, Zimmerman no a deklará nada den e kaso i desmentí tur kos. Esei segun e fiskal tabata entre otro e motibu dikon mester di mas tempu pa tratamentu. Pero sorpresivamente riba e dia di tratamentu, despues ku Coffie a bisa ku ta Zimmerman a tira, Zimmerman a bisa ku Coffie ta skonde e bèrdat i mester bisa ta ken ta esnan tras di e morto di Boechi. Fiskal Hato Willems, mesora a komprometé Zimmerman, pa deklará i si e tabata dispuesto na hasi esei e siguiente dia.

Segun Coffie, e no tabata sa mes di e intenshon pa asesiná Boechi Windster, sino entre su persona i Zimmerman tabatin un plan pa atraká e kantante defuntu. Den un vershon kòrtiku, Coffie a splika ku riba 9 di desèmber 2022, nan a kore pasa tres biaha dilanti Boechi pa wak tempu. Segun vershon di Coffie   na promé lugá e no tabata sa di e intenshonnan di Zimmerman, pero tambe a trata na evitá kalke intenshon pa los tirunan riba Windster. Na momento e vehíkulo a stashoná dilanti òf banda di Boechi, Zimmerman sin avisá Coffie a baha e glas i los tirunan dirigí riba Boechi Windster.

Awe e kaso ta planiá pa kuminsá mitar di 10 di mainta i korte a plania henter dia pa trata e kaso aki. E fiskal ku ta representá Ministerio Públiko ta mr Hato-Willems i  kada akusado tin nan propio abogado pa hiba defensa. Abogadonan Themen – Cairo i abogado Scheperboer – Parris ta bai hiba defensa pa Christopher Zimmerman. I abogado mr Loth ta hiba defensa pa akusado Churandi Coffie.