WILLEMSTAD – Ta e intenshon pa awe Minister di Salubridat Públiko, Medio Ambiente i Naturalesa (GMN) Javier Silvania firma e kontrakt relashoná ku e asina yamá ‘schikkingsbedrag’ ku mester paga Klínika Capriles den forma di un forskòt. Esaki den kuadro di un kaso den korte i tambe finansiamentu di mantenshon atrasá.

Manera ta konosí dia 5 di aprel último Konseho di Ministernan a bai di akuerdo ku e petishon di Ministerio di GMN pa trese kambio den presupuesto relashoná ku e ‘schikkingsbedrag’. E klínika lo risibí 3.9 mion florin pa problema agudo. E pago lo ta den ‘tranche’. Esaki ta nifiká ku tin kondishonnan mará pa por risibí kada ‘tranche’. Silvania den Parlamento durante e ora di pregunta tokante sektor salú mental: “Den e kontrakt tin pará duidelijk ku mester garantisá kuido na e pashèntnan i pago di salario na e trahadónan.”