Back to Top
Vigilante banner image

PWFC a proponé Damen pa paga e trahadónan den tres luna


June 30, 2021 • 2 minüt pa lesa

Trahadónan di Damen den akshon ayera.

DOK- Damen Shiprepair Curaçao ta sigui den problema. Den un reunion entre empleadonan, sindikato PWFC i nan abogado mr. Lisanne Asjes, e empleadonan a eksihí pa Damen duna nan tur derechinan riba vakashon bèk, kual e kompania a tuma sin tabatin derechi.

E sindikato PWFC a negoshá pero empleadonan ke kèsh i den oranan di ayera mainta e direktor a papia ku empleadonan. sin tabatin outorisashon di empleadonan, gerensia di Damen a apliká pa NOW i kita tantu pago komo dianan di vakashon for di e empleadonan. E desishon di Damen a keda konfirmá den un karta di gerensia. Segun e karta firmá pa Lodewijk Franken riba 6 di mei último, gerensia di Damen a disidí pa kuminsá reten’é 8.73% (15.13 ora di vakashon) for di e dianan di vakashon di tur empleado. Segun e gerensia, esaki komo nan kontribushon pa ku e areglo di NOW. Den e areglo di NOW, na momento un kompania risibí kompensashon despues di aplikashon, su empleado – nan tambe mester entrega sea 20% di nan salario òf dianan di vakashon. Pero e empleado mester bai di akuerdo ku e proposishon. Esaki no tabata e kaso na Damen. Na inisio di 2021 e situashon a sigui meskos ku Damen aplikando pa NOW kontra aprobashon di su empleadonan. Na Mart 2021 den un reunion e direktor a konfirmá na empleadonan ku e trayekto di NOW ta sigui.

E empleadonan a rechasá tur proposishon di Damen i nan ke sèn. Nan a bisa PWFC ku a kita sèn for di nan sin nan pèrmit i awor ta sèn nan ke mira bek den nan saku. Empeladonan ta papia di kèsh i nada mas e empleadonan no tabata kier a tende. Ounke Damen a splika di no tin sèn pa paga, e empleadonan a duna un mandato bek na PWFC pa trese sèn kèsh

Vigilante a papia ku señor Angelo Meyer ayera i el a bisa ku ketu bai nan ta deliberando serka señor Profas kende ta e mediadó ku gobièrnu a nombrá.

Señor Meyer a bisa  Vigilante ku ayera PFWC a trese e último proposishon pa Damen kual ta pa paga e trahadónan e sèn ku debe nan den tres luna. Pues awe durante dia e akshon ta sigui kaminda awor mester wak si Damen ta bai di akuerdo ku e proposishon di PWFC pa paga e trahadónan pues den tres luna.

Login