Back to Top
Vigilante banner image

Bakuna di HPV e forma mas efektivo pa prevení kanser na boka di matris


October 6, 2022 • 2 minüt pa lesa

Tin diferente tipo di HPV, e dos tiponan mas peligroso ta HPV 16 i 18, esakinan tin mas probabilidat pa provoká desaroyo di kanser.

PUNDA- Mundialmente diferente pais a inisiá un trayekto di bakunashon kontra e vírus di HPV, debí ku 95% di kanser na matris ta ser okashoná dor di e vírus. Sinembargo, ministerio di GMN akin a Kòrsou aun no tin un kampaña ni maneho pa loke ta trata e vírus di HPV ku por resultá den kasner na boka di matris.

Último dékada e konsientisashon pa bakuná kontra e vírus di HPV ku ta asosiá ku desaroyo di kanser, spesialmente serka hende muhé, a oumentá drástikamente. Diferente pais Oropeo, inkluyendo Hulanda, a implementá e bakuna kontra HPV den nan trayekto di bakunashon pa muchanan.

Segun datos internashonal paisnan ku a implementá e bakuna di HPV pa hende muhé a registrá un promedio di 90% redukshon den kasonan di kanser na boka di matris.

Aktualmente, WHO a inisiá un kampaña pa pusha tur pais pa kuminsá ku un trayekto di bakunashon. Den e kaso di WHO, nan ta enfatisá ku prevenshon di HPV via un trayekto di bakunashon ta un bon solushon pa aktua kontra kanser na boka di matris.

Mayoria kaso di kanser na matris ta kousá pa un infekshon ku HPV, kual ta e abreviashon pa vírus papilloma humano. Normalmente un persona no ta sinti mes ku nan tin e vírus. Sinembargo, e ta sumamente kontagioso si. Un persona ku ta kontagiá ku e vírus di HPV, por infektá un otro persona sin ku e sa.

Banda di kanser na boka di matris HPV ta asosiá ku mas tipo di kanser manera kanser na karganta, kanser rektal i kanser di vágina.

Mirando ku tin un retraso largu entre infekshon ku HPV i desaroyo di kanser, hopi hende no ta konsiente ku por prevení desaroyo di esaki pa medio di bakunashon, pasó de echo ta sumamente difísil pa prevení infekshon ku e vírus ku ta plama via relashon íntimo.

HPV ta un vírus ku ta afektá aproksimadamente 80% di personanan ku yega den kontakto ku e vírus por lo ménos un bia den nan bida. Motibu pakiko e bakunashon ta asina importante ta pasobra e vírus di HPV por kousa kanser pa hende muhé i hende hómber despues di añanan.

Aktualmente, Kòrsou no tin e bakuna kontra HPV inkluí den trayekto di bakunashon ainda, pero si ta posibel pa esnan ku ta deseá esaki pidi pa e bakuna via di nan dòkter di kas. Tòg ta keda importante pa konsientisá riba benefisio di e bakuna, mirando ku 20% di hende muhé entre 25 pa 65 aña tin e vírus. I den e grupo di damanan entre e edat di 20 pa 35 aña, 33% di e poblashon na Kòrsou tin HPV.

Fortunadamente no ta tur persona ta bira malu pa motibu ku generalmente e kurpa humano por eliminá e vírus riba su mes. Sinembargo, esaki no ta e kaso semper. Serka 10-20% di personanan ku keda kontagiá ku e vírus, e infekshon ta kousa kambionan na sélulanan humano sano. Na momentu ku e vírus kousa daño na un gran kantidat di sélula, esaki por resultá den desaroyo di kanser. Henter e proseso aki ta dura mas o ménos 10 pa 15 aña.

Ademas, e echo ku e bakuna por prevení desaroyo di kanser den futuro ta pone ku kisas mester kuminsá promové e bakuna di HPV aun mas bou di nos poblashon lokal.

Login