Bakunanan kontra Covid-19 ku ta basá riba téknologia di mRNA

PUNDA- Segun investigashon sientífiko publiká ayera, e bakunanan fabriká pa Pfizer i Moderna ta produsí un reakshon inmunológiko persistente den e kurpa humano kual por duna protekshon añosnan largu.

Resultado di e investigashon ta añadí na e evidensia kresiente ku personanan inmunisá pa bakunanan basá riba téknologia di mRNA probablemente no mester di èkstra shòt di bakuna komo refuerso miéntras e vírus i su variantenan no evolushoná muchu mas for di e formanan aktual. Sinembargo no por garantisá esaki, pa motibu ku no por premirá evuloshon di e vírus.

Luna pasá Dr. Ali Ellebedy, inmunólogo na Universidat di Washington na St. Louis i su koleganan a raportá ku den personanan ku a sobrebibí infekshon ku Covid-19, sélulanan di e sistema inmunológiko ku ta rekonosé e vírus a keda den e kurpa humano pa un mínimo di (8) luna despues di infekshon. Un otro estudio konduktá pa un otro  grupo di investigadó a indiká ku sélulanan di memoria ta keda madurá i fortalesé nan mes pa mínimo di un aña despues di infekshon.

Basá riba esaki investigadónan a sugerí ku inmunidat kontra Covid-19 por dura años, posiblemente bida largu, den personanan ku a keda bakuná despues di un infekshon di Covid-19. Aki aun no tabata konosí si inmunidat kreá pa bakunashon so, tambe lo por tin un efekto similar.

Dr. Ellebedy i su tim, a investigá durashon di inmunidat kreá pa e bakuna. Resultado di esaki, ku a keda publiká den revista sientífiko yamá Nature, a mustra ku diessinku (15) siman despues di e promé shòt di bakuna aun e sentro kaminda sélulanan inmunológiko ta situá tabata aktivo i e kantidat di sélula di memoria ku por rekonosé coronavirus no a redusí. Segun Dr. Ellebedy ta algu sumamente positivo ku e reakshon inmunógiko a kontinuá durante kasi kuater (4) luna. Normalmente e aktividat máksimo, den sentro kaminda sélulanan inmunológiko ta situá, ta wòrdu registrá un pa dos siman despues di bakunashon i despues e ta baha.

Segun investigashon publiká den Nature, konduktá pa Dr. Ali Ellebedy i su tim,
bakunanan basá riba mRNA por produsí inmunidat duradero

Por lo general, despues di kuater (4) pa seis (6) siman no tin registrashon di aktividat mas, Deepta Bhattacharya inmunólogo di Universidat na Arizona ta duna di konosé. Sentro kaminda sélulanan inmunológiko ta situá ku keda stimulá pa bakunanan basá riba mRNA ta mustra aktividat máksimo pa lunanan largu sin ningun redukshon. E resultadonan aki ta sumamente importante, Dr. Bhattacharya ta bisa. Mayoria informashon tokante efekto di bakuna di mRNA riba e kuerpo humano ta basá riba investigashonnan hasí riba bestia. E investigashon aki ta e promé ku ta mustra en detaye e efektividat di bakunanan, basá riba mRNA, riba e sentro kaminda sélulanan inmunológiko ta situá den hende.

E investigashon no a inkluí bakunanan kontra Covid-19 basá riba otro téknologia, por ehèmpel esun di Johnson & Johnson. Segun Dr. Ellebedy, ekspektativa ta ku e respuesta inmunológiko desaroyá pa e otro bakunanan lo ta ménos duradero ku esun di bakunanan basá riba mRNA.

E resultadonan ta sugerí ku mayoria persona bakuná lo ta protehá a largo plaso, en todo kaso, kontra e variantenan eksistente di Covid-19. Sinembargo, personanan di edat i esnan ku un sistema inmunológiko débil si probablemente lo rekerí un èkstra shòt komo refuerso. Personanan ku a sobrebibí infekshon ku Covid-19 i despues a keda bakuná, probablemente no mester di un booster shòt nunka mas.

Den personanan ku a keda afektá pa coronavirus i despues a risibí e bakuna, sientífikonan a mira un oumento den e nivel di antikuerpo. Motibu pa esaki ta probablemente paso e sélulanan di memoria, kual ta produsí antikuerpo, a haña mas tempu pa desaroyá i evolushoná promé ku a risibí e bakuna. Pues un “booster” lo sirbi meskos serka personanan ku nunka no a keda infektá Segun Dr. Ellebedy.

Pa loke ta trata refuerso di e sistema inmunológiko, bakunashon probablemente ta mihó ku rekuperá for di infekshon kousá pa Covid-19, Segun Dr. Ellebedy. Estudionan hasí ta sugerí ku e memoria produsí den sélulanan despues di bakunashon ta mas diverso ku esun generá pa e infekshon mes. Esaki ta pone ku probablemente e bakunanan lo duna mihó protekshon kontra variantenan kompará ku e inmunidat natural so.

Ta difísil pa premirá eksaktamente kon largu e protekshon di e bakuna lo dura. Den ousensia di variantenan nobo, en teoria, e inmunidat kreá pa e bakuna por dura bida largu segun ekspertonan. Lastimamente por mira klaramente ku e vírus ta evolushoná, i ta hasi esaki relativamente rápido.