Sientífikonan di Universidat Médiko na Groningen a publiká un artíkulo tokante redukshon den efektividat di e bakuna kontra Covid-19 serka pashèntnan ku ta risibí órgano transplante.

PUNDA- Resultado di un estudio konduktá pa sientífikonan di Universidat Médiko Groningen (UMCG), ta sugerí ku e bakunanan kontra Covid-19 no ta brinda mésun protekshon haltu serka pashèntnan ku resientemente a risibí un órgano transplante. Motibu pa esaki ta ku pashèntnan ku a risibí un órgano di transplante no ta krea sufisiente antikuerpo despues di a risibí e bakuna pa duna protekshon efektivo kontra Covid-19.

Investigadónan di UMCG a investigá efekto di e bakuna kontra Covid-19 riba pashèntnan ku problema di nir, pulmon i esnan ku kanser. Resultado preliminar a keda publiká e siman aki.

Segun e estudio, e vírus di Covid-19 ta mas peligroso pa pashéntnan ku a transplantá pulmon, mirando ku esaki ta e órgano mas afektá pa e vírus. Maske e bakunanan aprobá aktual ta seif pa uso den pashéntnan ku un sistema inmunológiko débil i òf perhudiká, e efektividat ku e bakuna ta brinda na e grupo aki ta limitá.

Debí na uso di medikamentu pa evitá rechaso di e órgano transplantá, e sistema inmunológiko di e pashèntnan aki ta keda perhudiká, kual ta hasi nan mas suseptibel na un infekshon manera Covid-19. Ademas, e remedinan ta redusí e kapasidat pa forma antikuerpo.

Pa e motibu aki pashèntnan ku un sistema inmunológiko perhudiká por benefisiá di èkstra shòt di bakuna komo refuerso. E grupo di investigadónan lo analisá efektividat di booster shòt pa loke ta desaroyo di antikuerpo den e grupo di pashèntnan aki. Un otro posibilidat ku e investigadónan ta duna ta pa suspendé algun di e remedinan, ku ta redusí funshon di e sistema inmunológiko, promé ku bakunashon si esaki ta seif.