Back to Top
Vigilante banner image

Bakunashon ta kritiko den e bataya di Covid-19


March 30, 2021 • 2 minüt pa lesa

Willemstad-  Bakunashon ta kritiko den e bataya di Covid-19 i e úniko manera pa gana e guera aki ta si mas tantu hende posibel bakuná pa asina yega e asina yama “herd immunity”. Ta importante pa bakuná mas hende mas lihé posibel pa motibu ku bakunashon ta yuda protehá un persona promé ku e keda eksponé na e vírùs i tambe ta baha e rísiko di e vírùs pa forma variante nobo.

E meta prinsipal na mundu ta pa stòp e profilashon di Covid-19, esaki tambe lo yuda pa e vírùs tin ménos variante. Aktualmente e medidanan prinsipal pa ku esaki ta: laba man frekuentemente, bisti tapa boka, distansia sosial, bon ventilashon i evitá aglomerashon.

Tur vírùs, inklui SARS-CoV-2, e vírus ku ta kousa Covid-19 ta evolushoná ku tempu. Ora un vírùs repliká òf dupliká su mes, e por kambia di struktura. Esaki ta un fenómeno normal. E kambionan aki den e vírùs ta loke sientífikonan ta yama “mutashon”. Un vírùs ku un òf mas mutashon ta wòrdu konsiderá komo un variante di e vírùs original.

E motibu ku un vírùs ta kambia pa un variante nobo ta pa su chèns pa sobrebibí bira mas grandi. Ora ku un vírùs ta sirkulá den un populashon grandi kaminda e por kousa hopi infekshon, e chèns pa e vírùs mutua tambe ta krese. Mas oportunidat un vírùs haña pa profilá su mes, mas oportunidat e tin pa krea mas variante. No ta tur mutashon den un vírùs tin un efekto riba e grado di infekshon di e vírùs. Esaki ta e kaso tambe ku Covid-19. Tin diferente variante konosí mundialmente ku karakterístikanan diferente for di otro. Un ehèmpel ta e vershon britániko ku a kousa hopi infekshon lokal, esaki ta konosí pa ta mas kontagioso ku e vershon original. Tambe tin otro vershonnan di SARS-CoV-2 ku ta pone ku bo ta haña síntomanan mas òf ménos severo ku e vershon original.

Awor ku tin un bakuna kontra di e vírùs di Covid-19, hopi hende ta kuestioná e efektividat di e bakuna riba e diferente variantenan ku SARS-CoV-2 a bin ta konosé. E organisashon di salubridat mundial (WHO) ta informá ku maske e bakuna ta trahá pa e vershon original di e vírùs, e bakuna no ta kompletamente inefektivo kontra e variantenan ku ta sirkulá rònt mundu. E argumento tras di esaki ta ku e bakunanan ku a ser aprobá ta provoká nos sistema imunológiko pa traha un variedat di antikuerpo i sélulanan pa kombatí e vírùs. Ademas, si akaso un di e bakunanan aprobá resultá di ta inefektivo kontra un òf mas variante, ta posibel pa sientífikonan kambia e komposishon di e bakuna pa e protehá kontra e variantenan nobo.

Pa esaki sientífikonan i dòkternan mundial i lokal ta pidi pa tur hende bakuná. E pensamentu pa no bakuná pasó tin diferente variante ta sirkulá no mester pone hende den duda. Echo ta ku bakunashon ta kritiko den e bataya di Covid-19, i e úniko manera pa gana e guera aki ta si mas tantu hende posibel bakuná pa asina yega e asina yama “herd immunity”. Diferente otro epidemia i pandemia a keda kombatí den historia pa medio di bakuna, Covid-19 no ta un motibu pa duda den e kapasidat i método di sientífikonan ku tin siglonan ta hasi esaki eksitosamente.

Login