WILLESTAD,—-Den kuadro di é normal nobo, diferente artista a uni pa huntu nos selebrá un Pasku diferente pero den e mesun seno familiar yená ku amor i felisidat ku tur desèmber nos a kustumbrá kuné. P’esei awe ta presentá pueblo un show virtual titulá “Christmas Live: Den kas di tur Famia.”

E show virtual ta reforsá e kompromiso ku nos artistanan tin pa entretené i pa semper deleitá nos komunidat ku nan komposishonnan. Sigur durante e periodo di desèmber ku ta reflehá un temporada yená ku sentimentunan bunita, un temporada kaminda nos ta rekonektá ku famianan; ekspresá gratitut pa tur nos bendishonnan; rekordá lèsnan balioso ku nos a siña durante e aña pero tambe pa rebibá e momentunan ku mas nos a disfrutá di dje.

E situashon ku aktualmente mundu ta eksperensiá ta pone hopi lubidá e sentimentunan bunita ku e temporada di desèmber ta reflehá. Esaki ta netamente e motibu dikon artistanan a uni pa huntu selebrá Pasku den kas di tur famia.

E evento lo ta unu kompletamente virtual i lo konsistí di un versalidat musikal enorme ku ta ofresé diferente género pa henter famia por disfrutá. Por konta ku presentashon di CACHE ROYAL, BOECHI, JAHARI, TSEAN, 2SYNC i hopi mas. Tambe lo bai tin presentashon den e género di Tambú di parti di ENCHI I SU GRUPO.

Pa garantisá un show riba nivel haltu, e transmishon lo ta optenibel via di un sistema ‘Pay-Per-View.’ E prosedura di PPV ta unu simpel i fásil pa traha kuné. Simplemente kumpra un karchi na Vigilante òf app na +5999 518 9339 pa reservá bo karchi, “scratch” e parti patras pa risibí bo kódigo, hinka e kódigo den e wèpsait, ‘Sign Up’ i disfrutá di un tremendo show. Pa kumpra karchi ònline subi riba www.clubblu.nl. E show ta tuma lugá 24 di desèmber próksimo i lo kuminsá 12AM na Hulanda i 7PM na Kòrsou.  Ademas, e sistema PPV sigur lo yuda nos artistanan generá un tiki entrada den un sektor ku for di mart 2020 ta kompletamente plat. Pues, ban sostené nos artistanan i huntu selebrá un Pasku den é normal nobo riba un distansha seif.