Desmentí: Lake no a duna kontesta si e tabata konosé Evelina, kende riba e foto a keda arestá.

Nieuwe Haven—Banko a bende kas di Charlton Lake “riba baratio”. Ta trata di un kas ku e la traha den Parke di Bibienda na Zuurzak. Ministerio Públiko a pone embargo riba e kas, despues ku Lake a risibí un kastigu di 8 aña.

Lake a keda akusá i kondená pa ta miembro di un organisashon kriminal. segun OM durante tratamentu den e Promé Instansha Lake a laba alrededor di 23 mion florin durante e periodo di 1 di Yanüari 2013 pa 27 di novèmber 2020. Ayera e Tribunal den Apelashon a menshoná 21 Mion florin. Korte den Promé Instansha a konkluí ku Lake tabata risibí i hasi pago pa e organisashon kriminal di NLS. Te tabata responsabel aki na Kòrsou pa maneho di plaka. E ta e persona di konfiansa aki na Kòrsou di Shurendy “Tyson” Quant. E tabata duna Evelina plaka pa bai hiba pa kriminal den prizon òf otro personanan ku mester keda pagá.  Segun Korte, ora bai wak e kuentanan di Lake, esaki niun no ta kuadra. E sèn ku e ta haña di entrada pa aña no ta di kompará mes ku e suma di plaka ku e ta gasta pa aña. Ta sumanan astronómiko ku Lake no por duna kuenta i rason di unda e ta haña nan. Durante tratamentu den su promé kaso, Lake mes no por splika di unda e ta haña tantu sèn ainda. E mes ta bisa ku e tin suerte ku ganamentu di lòt i kasino pero no tin nada pa prueba esaki. For di su promé interogashon Lake ta bisa ku e tin prueba.

Ayera a bin sali na kla ku e banko ku tabatin hipotek riba kas di Lake a bende e kas riba destaho. Abogado Moszkowicz a trese e punto dilanti pa informá e tribunal di bai mas den detaye durante su pleitu. Lake tabatin un Chevrolet Tahoe ku ta bal mas ku 137 mil florin.  Den prosès ferbal a bini dilanti ku ta sèn e la fia serka e komersiante P.. Un kas den Zuurzak, unda e tabata biba ku su famia. Ministerio Públiko a konfiská e kas. Banko a bende e kas despues bou di balor di konstrukshon, kual ta hopi abou. Tur kas den Zuurzak, su balor ta por lo ménos 40% mas haltu ku e balor di konstrukshon (executiewaarde) Tambe e tabatin un  Skuter Gilera, 3 boto riba su nòmber, Landcruiser ku ta bal alrededor di 83 mil florin. 

Ayera korte a trata na interog’ riba un kantidat  di prenda kual entre nan djamanta. Mas aleu prosès ferbalnan a indiká ku Lake a gasta mas ku 100 mil na pasashi, kumpra 2 outo marka Audi. Ta sospechá ku e vehíkulonan tabata pa famia di Tyson pero a registrá nan riba un primu i un kompania privá. Na total OM ta akusá Lake di a laba alrededor di 23 mion florin. 

Sumanan grandi tabata bin riba su kuenta entre otro di un persona di fam L. ku a pone mas ku 300 mil riba kuenta di Lake. Pa esaki tambe Lake no por a duna splikashon durante tratamentunan den Promé Instansha.

Ayera e la bisa solamente kuater frase kòrtiku ku e tabatin riba papel skibí. 1. E no ta miembro di NLS. 2. E no a laba sèn 3. E no tabatin un PGP Safe account anto 4. E no a uza sky telefon. Sobrá e ta laga pa su abogado hiba palabra.