Karta MCB: konfirmá ku Caribbean Forensic nunka a tuma kontakto ku nan riba Donker.

Brievengat—E kompania di investigashon forensiko, Caribbean Forensic a komprometé MCB Bank inkorektamente den un proseso di screening. Ta trata di un proseso di screening ku mester a tuma lugá riba kandidato pa direktiva FFK, Remfis Donker.

Segun un kombersashon telefóniko entre Remfis Donker i Benno van Leeuwen di Caribbean Forensic, tin dokumentashon kual ta den poseshon di Caribbean Forensic ku Donker lo a kometé froude na MCB Bank pa kual e la risibi su  retiro.

E informashon ku van Leeuwen a duna Donker via un kombersashon telefóniko, no tabata korekto i falsu. MCB den un karta na Remfis Donker a konfirmá ku nan no a duna niun informashon di Donker na Caribbean Forensic. Es mas, segun MCB Bank, Caribbean Forensic hamas a yega di yama i súplika informashon riba Donker, kende ta èks empleado na e banko. Pa sostené Donker den nan reakshon e banko siman pasa a manda dos karta, unu pa desmentí e kontakto ku Caribbean Forensic i dos konfirmá ku durante su empleo na MCB Donker a funshoná intachabel.