No a duna mas informashon, ademas di solamente edat, di e víktima.

CARACAS – Un beibi di apénas kuater luna di bida a fayesé na Venezuela pa kousanan di COVID-19 i a kombertí den e persona di ménos edat ku a fayesé pa e enfermedat na e pais.

Segun e reporte gubernamental, kua no ta agregá masha detaye di e forma kon e chikitin por a haña e vírùs, a fayesé na e estado di Yaracuy, na masoménos 300 kilometer di Caracas.

Mas aleu a indiká, ku ademas di esaki tin otro 5 persona mas ku tambe a pèrdè nan bida pa motibu di e pandemia.

Ademas di e chikitin, un muhé di 87 aña tambe a fayesé den e mesun region di e pais i otro di 74 aña na e estado di Trujillo. E reporte aki ta inkluí tambe tres hòmber di edatnan entre 43 i 86 aña.

Den e último 24 oranan, a sa di konfirmá 641 kaso nobo di infekshon, di kua 632 a keda produsí pa transmishon den e regionnan venezolano mes. Esaki miéntras ku tabatin nuebe kaso ku a keda importá, di pasaheronan di México.

Ku e numbernan aki, Venezuela a yega un total di 120.444 pashènt den e último 309 dianan, pero solamente 6.004 di esaki nan ta aktivo.