Back to Top
Vigilante banner image

Benta abou di Banco Caribe por afektá balor di tur penshun na Ennia


June 24, 2021 • 2 minüt pa lesa

65 mion: grupo pa kumpra Banco Caribe tin un dil riba mesa pa 65 mion florin, kual no ta yuda ku e daño okashoná na Ennia di 850 mion florin.

Punda—Benta mas abou ke e balor neto anotá riba balansa finansiero di Banco di Caribe, por kousa efektonan negativo na e balor propio di Ennia Caribe Holding. Konsekuentemente unu dje efektonan por bira un bahada den balor di tur penshon ku ta koriendo na Ennia.

Banko Sentral CBCS, na dos okashon no tabata kier a reakshoná riba e pregunta spesífiko si balor di e bolsa di penshun na Ennia ta baha, den kaso bende BdC na un preis mas abou ku su balor neto. Manera publiká komo primisia den Vigilante, ta negoshando un preis di benta na 65 mion florin. CBCS ta sintando ku un konsorsio lokal di off-shore pa kumpra BdC. Pero e problema no ta pa bende e banko, sino e konsekuensha pa e balor di tur penshun koriendo na Ennia Caribe Holding (Ennia Leven).

E problema a surgi durante tratamentu sivil unda propietario di Ennia Caribe Holding, Parman Group a demandá den korte pa eliminá e medida di emergensha. Parman, kende tin Hushang Ansary komo akshonista mayó ta alegando ku maneho na Ennia Caribe Holding i tur e kompanianan di dje ku trabou di Medida di Emergensha ta bayendo atras. Pero Korte, mediante e hóben wes Kimberly Lasten a opta pa duna preferensha na kontinuidat di e medida imponé na yüni 2018. Un otro aspekto importante ku a bini na tratamentu ta benta di aktivonan di Ennia Caribe Holding i kompanianan lig’a pa por mantené e balor di kobertura di aseguradonan na Ennia, prinsipalmente Ennia Leven unda e bolsa di penshun ta aloká.

Segun abogado mr. Altena di Ox & Wolf, Ennia a sufri un retraso di 850 mion florin despues ku eks direktornan a permití sakeo di aktivo i likides for di Ennia Caribe Holding. E sakeo a kousa riesgo riba e kota di kobertura di aseguradonan na Ennia. Pa tal motibu CBCS, a kuminsá negoshá pa bende aktivonan di e kompanianan yu i esnan ligá ku Ennia Holding. Unu di nan ta Banco di Caribe, kual por sierto ta e “baka lechera” di e konsorsio i esun ku ta trese mas likides na e grupo. Un benta na 65 mion florin, no ta bai drecha e posishon di kobertura na Ennia i konsekuentemente baha balor di e.o. penshunnan. CBCS su reakshon na Vigilante: bon tardi. Nos no tin reakshon riba e artíkulonan ku a wòrdu publiká den Vigilante”.

Login