Minister Charles Cooper: e gobièrnu ta sigui lokual tin den Akuerdo di Gobernashon. Benta di CPA te ainda no ta menshoná.

Punda— Benta di akshonnan den CPA ta riba duda. Esaki ta lokual por konkluí despues ku den Akuerdo di Gobernashon aktual, esaki no ta un prioridat. Pero COHO i Pakete di Pais ta dikta un otro direkshon. Mester bende propiedat pa generá sèn.

Unu dje propiedatnan negoshando ta benta di haf esta akshon den CPA. Pa Port of Rotterdam, unu dje kandidatonan,  e omishon di e terenonan riba balans di CPA ta un benefisio finansiero importante. Minister Charles Cooper, a duna di konosé den un deklarashon na Vigilante, no tin niun pida tereno ku CPA por haña.

Por lo ménos 60 mion florin lo ta envolví pa benta di 34% den haf di Kòrsou. Esaki ta un pre kalkulo ku ekspertonan den seno di e.o. APC ta hasiendo pa por yega na un preis pa nan parti di 14% adishonal. E fondo di penshun ya tin kòntròl riba 6% di e akshonnan den CPA, despues di a pone por lo ménos 10 mion florin riba mesa pa nan partisipashon aktual. Di parti di Port of Rotterdam e parti logístiko den Karibe ta importante  miéntras pa APC e terenonan no balorisá i no aktivá di CPA, ta oumentá balor di nan akshonnan na momento esakinan subi aktivo dje kompania..

Ta tratando na kalkulá awor kiko e demas 14% dje akshonnan den CPA ta bal sin e terenonan, kual ta wòrdu pronostiká di tin un balor komersial di riba 100 mion florin en total. Aktivashon di e terenonan riba balans di CPA tei duna un balor mas haltu dje akshonnan. Te ku kuenta anual 2018, ainda CPA no tin su terenonan aktivá riba nan balans. Pero si e benta ta sigui bou di aktual kabinete, ta un otro pregunta.