Dil?: for di 339 mion florin, den kaha di gobièrnu pa yuda ku likides a yega 12 mion florin. Te ku ayera atardi Zita Leito no a kontesta e pregunta si Liberty a kumpli ku e último pago di 53.7 mion florin.

Punda—Benta di UTS finalmente a kontribuí masha poko ku likides di gobièrnu i durante Covid no a yuda muchu tampoko. Entretantu tin rumornan ta sirkulando riba pago dje último pago final di 53.7 mion florin. E pago mester vense 21 di mart

Manera menshoná, e suma total riba benta di UTS no a yuda Kòrsou pa finansiá e periodo difísil di Covid. For di e benta neto di 142 mion florin (brutu 339) a risibí 72 mion for di kual 66 mion a bai pa CMC por finalisá fase di implementashon.  E demas 72 mion florin ta den kuentanan transitorio (escrow). Den e dil ku Flow Liberty, UTS a firma ku for di e 72 mion florin riba escrow, Kòrsou tei risibí solamente 10 mion na 2020. Segun Minister di Finansas Kenneth Gijsbertha e pago di e 10 mion a tuma lugá na final di mart 2020, pero pa rason deskonosí Kòrsou mester a manda 6 mion bek pa Liberty.

Aparentemente tabata pa motibu di valuashon robes di e aktivonan riba balansa di UTS na momento di benta. E saldo neto for di escrow te ainda ta na 4 mion florin risibí. Demas 54 mion florin mester ta disponibel for di ayera. Pero te ku ayera, no tabatin konfirmashon si  e plaka a subi kuenta na Banko Sentral.  Esaki ta nifiká ku na saldo Kòrsou a keda ku 4 mion plùs 5 mion miéntras CMC a paga bek 13 mion florin. En total 22 mion florin. Di e 22 mion florin, 6 mion florin a bai Sehos. A keda neto den Kòrsou su man te ainda 12 mion florin fo’i un benta brutu di 339 mion florin. Esei por bisa ta lokual benta di UTS a kontribuí dirèkt den kaha di gobièrnu di Kòrsou.  Esaki pasobra te ainda no tin konfirmashon  riba e pago di 54 mion florin (pa ta eksakto 53.7 mion) ku Liberty mester kanselá.