Punda—Por lo ménos 42.6 mion florin for di benta UTS nunka no a yega parlamento di Kòrsou pa spesifikashon ni tampoko rapòrt di kumplimentu relashoná ku pagonan di kréditor. Ta trata di e kategoria ku UTS a kategorisá komo “other liability”.

Te ainda falta hopi splikashon unda tur e benta na 339 mion florin a bai. For di e benta aki Kòrsou a risibi alrededor di 140 mion miéntras demas a bai na paga debenan ku UTS a krese dor di mal maneho atraves di aña. Demas partinan for di e bolsa di benta a bai na repago di fiansanan koriente 78.2 mion florin, retraso den impuesto 6.1 mion florin, pago na doñonan di konseshon 15.2 mion florin, demas negoshinan krédito 6.5 mion florin i “otro debenan”, kalifiká komo “other liability. Esaki ta lokual por konkluí for di un skema di presentashon ku maneho di UTS a presentá na Hunta di Komisario i Gobièrnu di Kòrsou.

E meta prinsipal di benta UTS na promé instante tabata pa krea kapital di invershon pero al final, te ainda e kapitalisashon riba e benta tabata mínimal miéntras preguntanan sin kontesta ta sigui kologá.   Manera ta konosí, di 339 mion florin ku akshonista di UTS, Gobièrnu di Kòrsou a bende UTS, 1.1 mion florin a wòrdu destiná pa depositá riba kuenta general di Gobièrnu. Sobrá sèn, ta destiná pa bai na pago di debenan di UTS. Despues di paga e debenan di UTS, Gobièrnu di Kòrsou a keda na invertí.  Ta trata di invershon no definí den CDI, drechamentu di aparato públiko i invershon no definí den infrastruktura.

Kálkulonan ta indiká ku UTS a bende su akshonnan na Liberty Latin America pa 339 mion florin i despues di deskontá obligashonnan finansiero retrasá, alrededor di  140 mion florin por bai pa gobièrnu. A proponé na presidente di e PMO Groestrategie, e tempu ei, pa pone 40% di e plaka di benta den diferente bolsa. Gobièrnu a duna un konseho adishonal  pa lokual ta regardá entrada generá ku benta di UTS: 40% di plaka mester a bai den bolsa di Curacao Development Institute. Pero kosnan tei mustra otro. Konseheronan a transformá  CDI di tal forma ku tur lokual nan a risibí fo’i benta di UTS mester subi kuenta di un banko di invershon Invest Curaçao. Invest Curacao , ta algu ku  Cft a menshoná ku tei bini. Segun Steven Martina, promé di baha e siguiente gobièrnu mester perkurá pa ehekushon di Invest Curaçao miéntras e la baha lagando e kosnan hopi leu.

Entre 50 pa 60 mion florin fo’i e benta di UTS, mester a  subi kuenta di Invest Curacao. Otro 40%, ta bai invertí den drechamentu di aparato públiko i mehorashon di servisio gubernamental. E sumanan ta kompletamente konosí pero detayes nunka a yega parlamento di Kòrsou.