Fasil: Berenschot ku Ballast Nedam ta mustra di risibi karta blanku durante Enkuesta Parlamentario.

Otrobanda—Miéntras konsultentnan lokal, a presentá i duna nan vershon i kontesta na e Komishon Enkuesta HNO/CMC, Berenschot si a keda permití na deklará tras di porta será.

E proseso di fakturashon i pago entre e dos organisashonnan, mester bira tópiko di investigashon i mester di hopi aklarashon despues ku ámbos organisashon a kuminsá ta tilda otro di a kobra i paga di mas. Nunka mas polítika di Kòrsou no a laga investigá e pagonan kuestionabel ku a tuma lugá.  Ni tampoko awor ku e Enkuesta Parlamentario ta tras di lomba.

Lokual ta konosí ta ku SOAB a haña enkargo pa investigá kon a usa e fondonan ku gobièrnu a pone na disposishon di SONA pa asina kumpli ku konstrukshon di hospital nobo. SOAB a investigá e periodo di 2013-2016. Entre e añanan aki, tabatin hopi transferensha pa lokual ta regarda konstrukshon di HNO. Segun un komunikado di SOAB, akountent interno di gobièrnu, nan a konsentrá e trabounan di kòntròl riba e manera kon SONA a usa e fondonan den e periodo menshoná. A base di esaki SOAB a hasi kòntròl di tur plaka risibí den e periodo 2013-2016 i tambe e gastunan hasí manera ku esaki ta pone den e atministrashon finansiero di e proyekto HNO. Despues di a hasi e kòntròl di tur esakinan SOAB a duna aprobashon na e dokumentashon di SONA pa e atministrashon finansiero di e periodo 2013-2016. Esaki ta inkluí e plakanan risibí i pagonan na Ballast Nedam Infra, Seawings (pa loke ta trata derecho di importashon), Berenschot International i otro partidonan ku tambe a desplegá trabounan den kuadro di e proyekto HNO. Tur esakinan a kana korekto i a haña aprobashon di SOAB.

Den un kasonan sivil ku a wòrdu tratá den korte di hustisia, kual verediktonan a bira definitivo, SONA ta akusá Berenschot por ehèmpel di a kobra miónes sin base. Lástimamente, interogashon di Berenschot no tabata unu públiko. Meskos a konta pa e kompania di konstrukshon, Ballast Nedam.