Port of Rotterdam.

Punda— E dil di kompra entre Curaçao Ports Authority i Port Of Rotterdam riba kompra di akshon, despues di 4 aña, no ke konkretisá. Un bishita di alkalde di Rotterdam na 2029, Ahmed Aboutaleb tampoko no a duna fruta pa konkretisá e akuerdo.

Entretantu e Haf di Rotterdam ta u desaster i ta birando un maneho skondí pe ulandesnan ku ta birando nan kara un otro banda. No ménos ku 8 mion kònteiner ta drenta haf di Rotterdam tur aña, den kual solamente 40 mil ta pasa den screening/scanner  i for di kual ménos di 6 mil ta wòrdu habrí pa duaneronan.  No tin niun klase di kòntròl riba e importashon deskabeyá di kokaina via di Rotterdam. Haf di Rotterdam ke bira 20% doño di CPA. E haf ta importá anualmente alrededor di 2.2 bion euro na balor di kokaina. Esaki ta hasi Rotterdam unu dje suidatnan narkotrafikante mas grandi na Oropa.

Rotterdam ta aloká riba 180 mil empleado den su haf, ku ta mas grandi ku e poblashon di Kòrsou. Na área kubrí, ta trata di alrededor di 25 mil tereno di futbòl. Munisipio di Rotterdam a laga e Universidat mas renombrá di Ulanda den komersio, Erasmus Universiteit, hasi un investigashon riba siguridat di nan haf. E estudio a konkluí ku e departamentonan hudisial dje suidat no tin sufisiente kòntròl riba siguridat den Port of Rotterdam. E estudio di Erasmus a wòrdu ouspisiá pa Ministerio Públiko, Duana i Kuerpo di Polis na Rotterdam. Segun e investigadónan na Erasmus por lo ménos un kuart di kokaina importá pa Oropa ta drenta via haf di Rotterdam, e futuro sosio di CPA.

Mayoria droga ku drenta e haf di Rotterdam ta den kònteiner di fruta i berdura. Esaki pasobra e kònteinernan aki tin urgensha riba nan i no por para largu den haf debí na fechanan di vensementu dje produktonan konserní.  Durante entrevista ku empleadonan dje haf na Rotterdam, a bin sali na kla ku no tin niun klase di siguridat, ken tin “badge” i outorisashon pa yega na e kònteinernan. Es mas, pa un suma di sèn, ken ku ta por drenta haf i habri kònteiner. Segun un reportahe di NOS, Port of Rotterdam tin diferente video graba unda  por mira kon organisashon narkotráfiko ta drenta haf di Rotterdam ku arma outomátiko i ta kore kònteiner saka sin niun hende interseptá esaki. Resultadonan dje lokual Erasmus a presentá a shòk e munisipio kompleto.

For di 2018 Kòrsou i Hulanda ta tratando na yega na un dil entre CPA i Port of Rotterdam.