Kantidat di kaso positivo raportá na RIVM, por mira un oumento den e último simannan.

KRALENDIJK – Segun e reportahe semanal publiká pa RIVM, Boneiru tin un bon bista riba e fuente di kontaminashon. Mayoria kaso nobo di Covid-19 ta bini for di e seno eskolar òf bou di personanan ku un historial di biahe.

Den e reportahe semanal di RIVM publiká dos siman pasá, Boneiru tabata e úniko isla ku a registrá oumento den kantidat di kasonan nobo pa loke ta infekshon ku Covid-19. Esaki relashoná ku komienso di aña eskolar nobo i un ekipo di deporte ku a biaha pa Santo Domingo.   

Durante e útlimo siman, kasonan nobo di Covid-19 na Boneiru a baha. Siman pasá 276 persona pa kada 100.000 habitante a tèst positivo kompará ku e siman promé unda 393 persona pa kada 100.000 habitante a tèst positivo. Esaki ta un dismunishon di 13.6 porshento pa 11.7 porshento den kasonan nobo positivo di Covid-19.

Hospitalisashon

Manera ya a menshoná, Boneiru tin un bon bista riba e fuente di kontaminashon. Mayoria kaso nobo di Covid-19 ta relashoná ku klùsternan den seno eskolar òf bou di personanan ku a biaha. Segun RIVM, e klùsternan a bini despues ku aña eskolar nobo a habri i un ekipo di deporte a biaha pa Santo Domingo. Esaki a pone ku resientemente tin un oumento den kasonan nobo entre personanan menor di edat. Na e momentu aki un total di 44 porshento menor di edat (12 pa 17 aña) a risibí por lo ménos un shòt di bakuna. Kontrali na Aruba i Kòrsou, Boneiru no tin ningun hospitalisashon registrá bou di personanan menor di edat.