Parlamentario Rennox Calmes.

WILLEMSTAD – Parlamentario Rennox Calmes di frakshon Trabou pa Kòrsou a manda un lista ku total 18 pregunta pa Presidente di Parlamento Charetti America-Francisca, ku e petishon pa invitá Minister di Finansa Javier Silvania bai kontestá nan personalmente na Parlamento.

Ta trata pues di e inovashon ‘vragenuur’, ku ta un reunion spesial di un ora den kua e Minister invitá ta amplia riba preguntanan hasí i duna un aktualisashon a base di esakinan. Presidente a rechasá su petishon.

Calmes den su karta ta para ketu na e konseho di Kolegio di Supervishon Finansiero (CFT) na Minister Silvania. Na promé lugá e ke sa dikon Silvania a tarda pa duna un reakshon riba e konseho di CFT. E kolegio a indiká ku konforme e lei di Reino ku ta regla supervishon finansiero RFT, e Minister mester a reakshoná denter di 14 dia, esta mas tardá 20 di febrüari, indikando kon Kòrsou lo implementá e rekomendashonnan di CFT. CFT a tuma nota sí dje petishon di Silvania pa ekstendé e periodo p’e reakshoná te 15 di mart, pero CFT a risibí e karta ku su reakshon dia 31 di mart numa. Calmes: “Pa kua motibu Minister no por a kumpli den e tempu stipulá?”

E Parlamentario a sigui mustra loke CFT a bisa, ku for di e reakshon di Silvania por saka afó ku ainda lo no duna kontenido na e rekomendashonnan di CFT, ni no a entregá un OBW. Tampoko ta anunsiá (otro) medidanan ni ta hasi kompromisonan tokante kon lo aliniá e presupuesto ku e standartnan di artíkulo 15 di RFT. Pregunta 2: “Kòrsou su presupuesto ta kuadra ku e normanan di ‘Rijkswet Financieel Toezicht’? Dikon CFT ta bisa ku rekomendashonnan di CFT ni lo no bini ku un ‘ontwerpbegrotingswijziging’? Esaki ta bèrdat? Nos por risibí un kopia di esaki? Ta bèrdat ku gobièrnu/minister den su reakshon no a manda niun desishon, kon lo hasi pa presupuesto di Kòrsou ta kuadra ku normanan di artíkulo 15 di RFT? Kiko sí gobèrnu/minister ta bai hasi pa kumpli ku esaki?

CFT ta di opinion ku Silvania inkorektamente den su reakshon ta vinkulá diskushonnan importante tokante kompensashon di défisitnan, redukshon di posishon di debe di pais i su posibel refinansiamentu, pero tambe (e finansiamentu di) invershonnan ekonómiko viabel, ku e negosiashonnan tokante e refinansiamentu di tur fiansa di estado deseá. Calmes ke sa: “Kiko gobièrnu/minister a proponé pa e 3 puntonan akí? Unda nos por lesa esakinan? CFT a splika dikon esakinan ta ‘inkorektamente vinkulá ku otro?”

Asina Calmes a sigui hasi 15 pregunta mas, kada un repartí den diferente pregunta mas, entre otro tokante hòspital Curaçao Medical Center (CMC).  “Kiko gobièrnu/minister ta bai hasi pa kumpli ku Pais Kòrsou tin un presupuesto konfiabel i realístiko? Kiko gobièrnu ta bai hasi ku e parti ‘significante onderschatting in belastingraam 2023 en meerjarig, dat niet volledige potentie tot begrotingsoverschotten laten zien’ (supestimashon signifikativo den kuadro fiskal 2023 i presupuestonan di mas aña, ku no ta mustra tur e potensial dje plakanan restante dje presupuesto)? Kua solushon gobièrnu tin? Ta bèrdat ku ora ku gobièrnu/minister kumpli ku e rekomendashonnan di CFT, nos presupuesto lo forma un base sólido pa tuma desishon tokante e velosidat di kompensashonnan ku ta kai kòrtiku, debe di gobièrnu i subida di invershonnan ekonómiko rendabel? Kua solushon struktural gobièrnu/minister ta proponé pa e situashon finansiero prekario di CMC?”

E Parlamentario su karta di pregunta ta hopi amplio. Muchu amplio na opinion di Presidente di Parlamento. “Bo petishon fechá 28 di aprel 2023 pa hasi pregunta ku e tópiko: ‘Pregunta den kuadro di Vragenuur (Ora di Pregunta) dirigí na minister di Finansa’, a keda rechasá. Konforme artíkulo 96A, insiso 3 i 4 di Reglamento di Orden, bo petishon mester ta basá riba solamente un tópiko i e preguntanan mester ta kòrtiku i konsiso. Bo petishon no ta kumpli ku e kriterionan akí.”

For di tempu a introdusí ‘Ora di Pregunta’, el a yega di ninga dos petishon di PAR, pasó e tema no tabata aktual. Otro motibunan ku e Presidente por usa ta: a trata e tema kaba resientemente den reunion di Parlamento; lo trata e tema denter di 2 siman den reunion di Parlamento; e tema no ta sufisientemente pisá; a hasi e preguntanan kaba resientemente por eskrito na Minister; a hasi e preguntanan resientemente durante un ‘vragenuur’; e preguntanan no ta dirigí n’e Minister kompetente; e tema no ta regardá un asuntu di gobièrnu; e tema ta suheto na investigashon (hudisial) i/òf ta den tratamentu den Korte; i/òf e fuente di bo informashon ta dudoso.