Back to Top
Vigilante banner image

Caryl Monte na 2009 a konsehá kontra Leinan di Konsenso


March 28, 2022 • 3 minüt pa lesa

Caryl Monte: “ora e sak’i plaka kaba, kuantu outonomia, prinsipio i libertatnan esensial mas nan ta dispuesto pa entregá?”

Punda–  Aktual presidente di e Komishon pa Reformashon den kuadro di ehekushon Pakete di Pais Kòrsou, Caryl Monte na 2009 tabata kontra pa introdusí Leinan di Konsenso. Monte, kende a partisipá aktivo den kampana kontra di Leinan di Konsenso, a bisa ku Kòrsou no mester entrega su outonomia pa benifisionan temporal.

Komo Presidente di e Komishon pa Reformashon, Caryl Monte mester dirigí i guia e komishon komo counter part di Gobièrnu den e proseso pa ehekutá e Pakete di Pais, komo e parti operashonal di COHO. Na 2009, Caryl Monte a atvertí Kòrsou pa apsolutamente no entrega nada riba su Outonomia. Segun Monte, “na 1954 ku binida di Statüt, nos a haña un libertat esensial ku yama “outonomia”, pero e mes gobernantenan ku a lubidá di sigui desaroy’é manera debe ser awor ta kla pa entreg’é pa un “bienestar temporal”. Ora e sak’i plaka kaba, kuantu outonomia, prinsipio i libertatnan esensial mas nan ta dispuesto pa entrega? Tin un dicho spañó ta bisa: “La libertad ni se compra, ni se vende”. A kaso nan no sa ku ta libertat esenshal nan ta entregando òf nan tin un sabiduria ku un gran parti di pueblo manera nos no por komprondé?”

Monte den su opinion publiká na 2009 den un korant sosten’é pa “NO” a manda mensahe pa e siguidonan di “SI” tene kuidou ku “saku di plaka” fo’i Hulanda. Pasobra momentu e saku di plaka kaba, manera ta e kaso aktual na 2022, tin riesgo ku Kòrsou lo sigui entrega mas outonomia. E la deklará públikamente ku aparentemente nos mandatarionan ta dispuesto pa entrega nos outonomia riba e terenonan krusial pa maneho i kontròl di nos mes pais, pa un supuesto saku di plaka ku lo bini tiki tiki kada bes ku un bono di gobièrnu vense. Segun Monte, nos lo keda biba ku e ansha pa largu tempu, ku si nos no kumpli òf faya di kumpli ku e tantísimo kondishonnan ku Hulanda a pone, Hulanda lo no paga e próksimo debe ku vense. Monte a bisa ku pasado a demostrá (den e vários areglonan ku IMF) ku e chèns ta grandi ku nos lo no por kumpli ku e tantísimo kondishonnan pone den e “Slotverklaring” i konvenionan ku a bini despues. “Pakiko pone nos mes den un situashon ku ta lágrima so e lo trese den futuro?”, e la manda puntra mandatarionan na 2009.

Segun Monte,  historia internashonal a demostrá ku un outonomia fuerte, un outonomia di bèrdat, ta keda e libertat di mas esensial di un pueblo, i e ta e base di tur kos ku un pueblo ke logra, polítikamente, kulturalmente, sosialmente i ekonómikamente. Solamente a base di e libertat ei, nos por realisá un relashon real ku Hulanda, e otro islanan i hinter mundu.

Monte: “ta p’esei laga nos asumí nos responsabilidat individual pa konserva i defendé e logronan den nos Statüt, nos outonomia, nos emansipashon, nos pais, dignamente, enteramente, kompletamente! Respetá e lucha di nos antepasadonan, respetá bo mes, respetá e dignidat di bo pueblo, respetá e derechinan di bo yunan ku tin ku dirigí e pais aki na e manera ku nan ta haña bon, sin intervenshon desproporshonal di otronan ku no ta elihí o nombra pa nos mes: Vota pa bo outonomia sagrado, vota pa prinsipio riba plaka, vota “No” den e referèndem di mei 2009!”

6 aña despues ku Monte a protesta kontra introdukshon pa introdusí Leinan di Konsenso, e la keda apuntá pa gobièrnu di Kòrsou pa un tarea importante.  Caryl Monte i Stanley Betrian tabata e dos ekspertonan apuntá pa gobièrnu di Kòrsou pa por ta den e komishon di evaluashon Leinan di Konsenso Penal. E 4 leinan penal a wòrdu prolongá den nan promé tèrmino fo’i 2015 i despues atrobe na 2019. E Leinan di Konsenso Hudisial despues di a keda prolongá na dos okashon, tabatin konsekuenshanan grandi durante nan implementashon. Diseñádonan di e leinan, kende a formulá nan for di 2006 pa 2010, tabatin e formashon legal pero niun eksperto den e komishonnan nunka no a pensa riba transformashon, Pa kolmo, na 2015 i tampoko na 2019 a instituí un komishon di evaluashon ku tampoko no tabatin e konosementu nesesario pa traha nota di akshon unda i kon eksaktamente mester a kambia e strukturanan organisatorio na polis. E transformashon di Kuerpo di Polis pa tal motibu a resultá den un káos kousando demotivashon grandi i separashon di outoridat informal unda rèspèt pa e liña di komando a pèrdè balor. Entretantu e funshon mas importante di alokashon di rekurso den e kuerpo no ta definí, despues ku na 2105 a opta pa entrega esaki den man di e unidat di RST. Esaki debí ku 1/3 parti di Lei di Polis, den forma di GVP no a wòrdu implementá.

Login