Back to Top
Vigilante banner image

CBCS ta mantené e nivel aktual di su tasa di interes ofisial


June 19, 2024 • 3 minüt pa lesa

WILLEMSTAD/PHILIPSBURG — Centrale Bank van Curaçao en Sint Maarten (CBCS) a tuma e desishon di mantené su maneho monetario aktual sin kambio. Esei ta nifiká ku e tasa di interes ofisial (‘beleningsrente’) lo keda na 5,75%.


E desishon akí ta basá riba e desishon di Reserva Federal Estadounidense (Fed) di mantené su tasa di interes ofisial aktual te ora tin mas siguransa ku inflashon ta moviendo, na un manera sostenibel, den direkshon di e ophetivo di 2 porshento. Ademas, aunke ta premirá un bahada leve den kobertura di importashon te 4,6 luna den 2024, e kobertura akí (ku de echo ta e ophetivo operashonal prinsipal di CBCS su maneho monetario) lo keda kómodamente riba e norma di tres luna. Apesar ku algun di e insertidumbrenan ta persistente, si tin kambio den e indikadónan di maneho monetario, ribatérmino kòrtiku, probablemente efekto di e kambionan ei lo ta limitá.

Segun e proyekshon mas resien, e défisit riba kuenta koriente di balansa di pago komo porsentahe di PIB lo baha di 15,7% na 2023 pa 13,8% na 2024. Maske ta proyektá un bahada den e défisit riba kuenta koriente, e proyekshon revisá pa 2024 ta 0,1 punto porsentual mas haltu ku esun publiká na mart 2024. ‘E oumento leve den e proyekshon di e défisit riba kuenta koriente komo porsentahe di PIB no ta debí na un oumento den e défisit riba kuenta koriente, sino na e echo ku e PIB nominal pa nos union monetario ta mas abou ku den e proyekshon anterior. Ta premirá un bahada den e défisit riba kuenta koriente debí ku den e proyekshon nobo, e oumento den eksportashon neto di produkto i servisio ta mas fuerte, moderá pa un mehoransa ménos fuerte den e balansa di transferensia koriente’, segun direktor ehekutivo, dr. José Jardim. ‘Eksportashon neto di produkto i servisio lo oumentá den 2024, prinsipalmente debí na un oumento den eksportashon, moderá pa importashon mas haltu. E oumento den eksportashon ta prinsipalmente resultado di un subida den entrada di divisa for di turismo. Na su turno, e oumento den importashon proyektá ta debí prinsipalmente na mas importashon di merkansia. Ta antisipá ku importashon di merkansia lo oumentá prinsipalmente den sektor di komèrsio por mayor i detal, debí na mas gastu di turista i un demanda doméstiko mas haltu na ámbos pais di e union monetario. Ademas, e invershonnan privá ku ta andando na ámbos pais lo hiba na un oumento den importashon di merkansia den sektor di konstrukshon i sektor di utilidat’, Jardim a splika.

Despues di un oumento na 2023, den e lunanan te ku mei 2024 reserva ofisial bruto a baha ku NAf. 71,4 mion. E bahada akí ta debí prinsipalmente na retiro di depósito na dòler ku e bankonan komersial i invershonistanan institushonal a hasi na CBCS, mitigá pa transferensia for di eksterior i benta neto di divisa ku CBCS di parti di e bankonan komersial. E transferensianan for di eksterior tabata di parti di Banko Mundial (relashoná ku rekonstrukshon di Sint Maarten), di fondonan dipenshun i di Ministerio di Finansa hulandes. Maske ta proyektá un bahada leve den reserva ofisial bruto pa 2024, segun proyekshon, e kobertura di importashon promedio lo baha di 4,7 luna na 2023 pa 4,6 luna 2024 i esei ta kómodamente mas haltu ku e norma di tres luna. Likides di e bankonan komersial a bin ta baha. Den e promé sinku lunanan di aña, esaki a baha ku NAf. 128,4 mion, prinsipalmente debí na e retiro neto di saldo na dòler for di CBCS, oumento di e reservanan obligatorio i kompra neto di sertifikado di depósito.

E último biaha ku Reserva Federal Estadounidense (Fed) a revisá su tasa di interes ofisial ta na yülidi 2023. Te asina leu den 2024, no a kambi’é mas debí ku, aunke inflashon a moderá, e ta haltu ainda. Segun espektativa, den transkurso di 2024, inflashon na Estádos Unídos lo keda den besindario di 3,0 porshento. Pues, ta premirá ku Fed lo no adaptá su tasa ofisial tanten ku e no tinmas konfiansa ku inflashon ta moviendo na un manera sostenibel den direkshon di e ophetivo di 2 porshento. No opstante, e próksimo ahustenan di tasa di Reserva Federal Estadounidense lo dependé tambe di e perspektivanan ekonómiko i di un evaluashon di e faktornan ku por afektá e perspektivanan ei, faborable- òf desfaborablemente. ‘Ya ku no ta antisipá kambio di e tasa di Reserva Federal Estadounidense riba término kòrtiku, ta probabel ku e tasanan di interes riba merkado monetario internashonal lo keda relativamente stabil. P’esei, i mirando ku NAf. ta mará na dòler estadounidense, CBCS ta premirá ku e impakto riba e tasanan di interes riba merkado monetario di e union monetario di Kòrsou i Sint Maarten lo ta mínimo’, dr. Jardim a splika.

Login