CBCS, dr. José Jardim.

 WILLEMSTAD, — Centrale Bank van Curaçao en Sint Maarten (CBCS) a tuma e desishon di adoptá un maneho monetario mas stringente, oumentando su tasa di interes ofisial (‘beleningsrente’) 1 ku 75 punto básiko, te na 5,50%. E oumento akí, ménos fuerte ku esunnan den 2022, ta konsistente ku e oumento proyektá di tasa di interes riba merkado finansiero internashonal, en partikular e tasa di Reserva Federal Estadounidense (Fed).

Maske e reserva ofisial bruto komo e kobertura di importashon ta sólido, nan a baha den 2022 i ta premirá ku nan lo sigui baha, aunke na un ritmo mas moderá den 2023. Mirando esaki, CBCS su Komité di Maneho Monetario (MPC)2 lo sigui vigilá djaserka e desaroyonan ekonómiko i monetario den e union monetario i lo ahustá e maneho monetario si ta nesesario. E oumentonan eksorbitante tantu di preis di krudo komo di otro produkto básiko riba merkado internashonal a pone e relashon di interkambio di e union monetario deteriorá rápidamente. A base di e sifranan real di te ku e terser kuartal di 2022, ta kalkulá ku na 2022 e défisit riba kuenta koriente di union monetario a subi te na 22,8% di e Produkto Interno Bruto (PIB). Asina mes, esaki ainda ta ménos ku loke a proyektá na e anterior reunion di Komité di Maneho Monetario, na fin di novèmber 2022. ‘A baha e pronóstiko di e défisit riba kuenta koriente prinsipalmente mirando ku ta proyektá un bahada ménos fuerte den eksportashon neto di produkto i servisio. Esei na su turno lo ta debí ku eksportashon di produkto i servisio lo surpasá e nivel premirá; en partikular, entrada di divisa for di turismo di estadia, servisio di transporte i aktividat di bùnker lo ta mas haltu. Sinembargo, e preisnan di produkto básiko riba merkado internashonal, i spesialmente di alimento i krudo, a surpasá proyekshon, i debí na esei importashon a oumentá mas rápido ku loke a antisipá’, segun direktor ehekutivo di CBCS, dr. José Jardim. ‘En kambio, ta proyektá ku e défisit riba kuenta koriente lo baha te na 19,7% di PIB na 2023. E bahada akí ta reflehá prinsipalmente un oumento den eksportashon neto di produkto i servisio, debí ku e oumento den eksportashon, impulsá pa un subida den entrada di divisa generá den sektor di turismo i servisio di transporte, lo surpasá e oumento den importashon. Na su turno, e oumento den importashon lo ta resultado di un subida den demanda doméstiko i gastu di turista, moderá pa un bahada den preis internashonal di petroli’, Jardim a agregá.

 Na 2022, reserva ofisial bruto a baha ku NAf.257.7 mion. Mirando ku finansiamentu eksterno i e transferensianan di kapital lo no ta sufisiente pa kubri e défisit riba kuenta koriente, ta proyektá ku e reserva lo sigui baha den 2023, aunke na un ritmo mas moderá. Segun e kálkulonan di mas resien, kobertura di importashon a baha, di 5,0 luna na desèmber 2021 pa 4,6 luna na desèmber 2022, te na 4,5 luna pa fin di febrüari 2023. Apesar ku kobertura di importashon a bin ta mustra un tendensia di bahada, ainda e ta kómodamente riba e norma di 3 luna. Mientrastantu e likides di e bankonan komersial a sigui baha den 2023, despues di a baha te na mitar den transkurso di 2022. E aserkamentu agresivo di Reserva Federal Estadounidense (Fed) pa oumentá tasa di interes den 2022 a duna resultado, ya ku inflashon a moderá, aunke ainda e ta haltu. Segun ekspektativa, inflashon lo sigui baha na 2023, entre otro debí na ménos traba den e kadenanan di suministro, aunke resientemente preis di kombustibel a bolbe kuminsá subi. Ya ku ta spera un inflashon mas abou na 2023 kompará ku 2022, ta spera tambe ku Fed lo oumentá su tasa di interes ménos. Por sierto, e oumento di yanüari 2023 tabata ménos fuerte ku esunnan anterior. ‘Oumento di e tasa federal tin un efekto inmediato riba e tasanan di interes riba merkado monetario internashonal i debí na e tasa di kambio fiho entre NAf. i dòler estadounidense tambe riba e tasanan di interes di e union monetario di Kòrsou i Sint Maarten’, dr. Jardim a splika. ‘Mirando e senario akí, CBCS a disidí di oumentá e tasa di interes ofisial ku 75 punto básiko te na 5,50% entrante 10 di mart 2023. Por lo demas, CBCS lo sigui konsentrá riba alargá e plaso promedio di e sertifikadonan di depósito (na ingles, CD) ku ta den sirkulashon, ofresiendo plaso mas largu (di 12, 26 i 52 siman) na e emishonnan di CD ku ta tuma lugá kada dos siman’, asina dr. Jardim a indiká. Despues ku a introdusí e kambionan den maneho di CD na sèptèmber 2022, tabatin un oumento den e proporshon di sertifikado ku plaso mas largu, i esaki a yuda hisa e plaso promedio di e sertifikadonan den sirkulashon. ‘Esei ta nifiká ku likides di e bankonan lo keda mas tantu tempu den merkado doméstiko, loke lo yuda mantené e posishon di divisa sólido’, Jardim a konkluí.