Skalo – Centrale Bank van Curaçao en Sint Maarten (CBCS) a tuma e desishon di pousa fleksibilisashon di su maneho monetario i no kambia su tasa di interes ofisial (‘beleningsrente’) ni e porsentahe di reserva obligatorio.

Esei ta nifiká ku e tasa di interes ofisial lo keda na 4,75% i e porsentahe di reserva obligatorio na 18,50%. E desishon akí ta bini despues di un redukshon di 0,50 punto porsentual den tur dos instrumento na novèmber 2024, basá riba e posishon di divisa sólido i stabil i e kobertura di importashon adekuá di e union monetario. E desishon pa mantené e tasa di interes ofisial ta basá riba e oumento di insertidumbre ku tin den komèrsio i merkado finansiero internashonal i e desishon di Reserva Federal Estadounidense (Fed) pa, te asina leu, tene su tasa ofisial na e mesun nivel e aña akí. ‘Aunke e indikadónan ekonómiko i monetario doméstiko ta desaroyando konforme espektativa, e riesgonan ku por tin un efekto negativo riba e perspektiva a oumentá, spesialmente esunnan relashoná ku oumento di protekshonismo den polítika komersial.

P’esei, CBCS ta keda kouteloso i lo sigui vigilá e desaroyonan ekonómiko doméstiko i internashonal djaserka, spesialmente e indikadónan prinsipal di maneho monetario den nos union monetario, i lo ahustá su maneho si ta nesesario’, asina direktor ehekutivo, dr. José Jardim, a deklará. Segun e kálkulo di mas resien, e défisit riba kuenta koriente di balansa di pago komo porsentahe di PIB a subi, di 15,8% den 2023 pa 16,5% den 2024. Esaki ta debí prinsipalmente na un bahada den eksportashon neto di produkto i servisio. Eksportashon neto a kai debí ku e oumento den importashon, impulsá prinsipalmente pa e invershonnan ku ta andando na ámbos pais, a krese mas lihé ku e nivel eksportashon. Eksportashon a krese, reflehando e entradanan di divisa for di sektor di turismo i di transporte na tantu Kòrsou komo Sint Maarten. Segun proyekshon, den 2025, e défisit riba kuenta koriente lo baha kompará ku 2024, te na 13,7% di PIB. Por atribuí e bahada akí prinsipalmente na un oumento den eksportashon neto di produkto i servisio, impulsá pa un kresementu den eksportashon, kombiná ku un bahada den e kosto total di importashon. Ta premirá ku, den 2025, eksportashon lo krese na ámbos pais di e union monetario, apoyá pa un oumento den entrada di divisa, prinsipalmente di aktividat turístiko. Na mes momento, e bahada proyektá den preis internashonal di krudo lo hiba na un bahada den e kosto total di importashon.

Te asina leu, e indikadónan monetario ta desaroyando konforme espektativa. ‘Apesar di e défisit riba kuenta koriente, reserva ofisial bruto a oumentá ku NAf.63,4 mion den 2024 i, te 4 di mart último, ku NAf.176,7 mion den 2025. Na mes momento, kobertura di importashon a subi, di 4,5 luna na fin di 2023 pa 4,6 luna na desèmber 2024, i te 4,8 luna na febrüari 2025, kedando kómodamente riba e norma di tres luna. Ademas, despues di un oumento den 2023, likides di e bankonan komersial a mira un bahada gradual den 2024, i e tendensia akí a sigui den e dos promé lunanan di 2025’, Jardim a splika. No opstante, CBCS a disidí di mantené su tasa di interes ofisial na 4,75%, mirando ku te asina leu e aña akí, Reserva Federal Estadounidense (Fed) a mantené esun di dje na 4,50%. E pousa akí den fleksibilisashon di Fed su maneho monetario ta debí entre otro na un oumento di insertidumbre den komèrsio i merkado finansiero internashonal, despues ku tabatin un oumento di protekshonismo den polítika komersial di gobièrnu estadounidense. E echo ku Fed a disidí di no kambia su maneho aktual ta indiká ku nan ke ta kouteloso, buskando un balansa entre kresementu ekonómiko i riesgo di inflashon, pa na su debido tempu nan sigui fleksibilisá nan maneho monetario gradualmente. ‘Ya ku probablemente Fed lo mantené e tasa di interes ofisial stabil, ta premirá ku e tasanan di interes riba merkado monetario internashonal lo baha ku ménos rapides den 2025. I debí na e tasa di kambio fiho entre NAf. i dòler estadounidense, esei na su turno lo tin su efekto riba e tasanan di interes riba merkado di e union monetario di Kòrsou i Sint Maarten’, dr. Jardim a indiká.

Ademas, despues di a baha e porsentahe di reserva obligatorio ku 0,50 punto porsentual dia 16 di desèmber 2024, CBCS lo mantené e porsentahe akí na 18,50% riba término kòrtiku. ‘Segun proyekshon, reserva ofisial bruto lo sigui krese den 2025, aunke na un ritmo mas lento ku den 2024. Sin embargo, e riesgonan ku por afektá e pronóstiko akí ta prinsipalmente negativo. Spesialmente e oumento di protekshonismo, i partikularmente e derechonan di importashon mas haltu ku Estádos Unídos ta aplikando, por hiba na medida di represaya di parti di nan partnernan komersial i kisas na un guera komersial. Esei, na su turno, por okashoná oumento den preis di importashon na Kòrsou i Sint Maarten. Ya ku ámbos pais ta dependé bastante di importashon, un oumento di preis por hiba na un kompra neto di divisa i un retiro neto di saldo na dòler, afektando asina e reserva ofisial bruto’, el a sigui splika. ‘No opstante, CBCS lo sigui ofresé sertifikado di depósito ku tasa atraktivo na e emishonnan semanal, pa likides di e bankonan por keda mas largu riba merkado doméstiko i asina yuda mantené un posishon sólido di divisa’, asina dr. Jardim a konkluí.