Back to Top
Vigilante banner image

 Chevron ta desviá Bullenbaai preferá transbordá riba laman


January 27, 2023 • 2 minüt pa lesa

Voyager tabata sirkulá rondó di awanan na Aruba sin skohe pa Bullenbaai

Bullenbaai—E kompania estado unidense Chevron ta transbordando krudo venezolano pa Estádos Unídos, sin ta uzando e fasilidatnan di Bullenbaai. Esaki ta lokual por konkluí for di informenan internashonal prosedente di Reuters.

Segun Reuters, ayera, Estádos Unídos/Chevron a kuminsá manda nan di sinku kargamentu di krudo pa Estádos Unídos pa rafiná. Ta trata di e tènkernan Amalthea bou di bandera griego i Caribbean Voyager bou di bandera di Bahamas. Amalthea ta subi ku un kargamentu di 250 mil bari di krudo miéntras Voyager ya ta hasiendo nan di dos entrega di 500 mil bari di krudo.

For di investigashonnan di Reuters, Caribbean Voyager ta uzando e sistema di STS, “Ship to Ship” transferensha, lokual ta indikativo ku Chevron ta desviando posibilidat di uza Bullenbaai komo opshon di transborde. E transborde di barku pa barku ta sosodé den awanan di Aruba unda Caribbean Voyager ta tuma e krudo for di un otro tènker, den e kaso aki Scaleo. E motibu dikon Chevron ta apliká e sistema di STS, ta pasobra ta demasiado riskante pa laga e tènkernan grandi drenta awanan plat pa kargamentu for di e refineria.

Konsekuentemente, Chevron, ku na e momentonan aki ta bai manda nan di 6 kargamentu di krudo pa Venezuela ta optando pa bai STS. Chevron na novèmber último a risibi un lisensia ofisial di OFAC pa por eksportá krudo for di Venezuela. E kompania di Kòrsou, CPR, no tin e lisensia aki.

Chevron a bon konfrontá problema debí na awanan plat pa nan tènkernan grandi yega e refinerianan en kestion. Caribbean Voyager por ehèmpel mester para pafó den awanan di Aruba pa por permití un otro tènker trese e krudo pe. Esaki ta un proseso kostoso. Pero tòg te ainda Chevron no ta mirando e posibilidat di uza Bullenbaai ku na e momentonan aki ta bou di kontrakt ku CPR, Caribbean Petroleum Refinery di grupo Giusti. Chevron ta eksperensiando hopi retraso debí na awanan plat i hopi sushi den e kanalnan pa yega na e waf di transborde. Na desèmber último tabatin bastante insidente ku barkunan pegando den e awanan plat den e.o. bahia di Markabo.

Informashon riba internet ta indiká ku Chevron a uza e tènker Caribbean Voyager pa bini ku krudo venezolano. E tènker mester a drif algun dia pafó di kostanan di Aruba pa laga un di dos tènker Sealeo trese krudo pe. Den e promé transborde tabatin un kantidat di 500 mil bari di krudo (Hamaca) envolví. Legítimamente pa Chevron lo ta hopi mas fásil pa e por pega Caribbean Voyager na Bullenbaai i hasi transborde. Den e sentido aki, Kòrsou ta perdiendo un oportunidat serio di hasi negoshi ku Chevron, kual ta e úniko kompania na e momentonan aki ku un lisensia di OFAC.

Chervron tabata hasi STS dilanti portanan di Bullenbaai
Bullenbaai a pèrdè chèns awor ku Chevron ta aplikando e sistema di STS riba laman ganchu.
Login