Back to Top
Vigilante banner image

Chevron ta risibi lisensia pa eksportá krudo fo’i Venezuela


November 30, 2022 • 3 minüt pa lesa

Isla—Wikènt tras di lomba e kompania Estado Unidense, Chevron, a risibi un lisensia ofisial pa kuminsá eksportá krudo for di Venezuela. Ku e desishon, Chevron ta risibi e posibilidat di rekuperá biónes di debe ku PDVSA debe e kompania.

Pa Refineria Isla, e notisia por bira un apertura pa prosesá krudo na Kòrsou. E lisensia di Chevron ta permití e kompania estado unidense pa importá ekipo di sosten pa asistí PDVSA na eksportá demas derivadonan tambe. Demas kompanianan manera Baker Hughes, Hailliburton, Schlumberger i Weatherford tambe a laga renobá nan lisensia pero no por a ekspandé esakinan, lagando atras un posibilidat limitá di eksportá krudo venezolano.

Pa Kòrsou, e anunsio di Chevron por ta un bon notisia. Tantu pa e posibilidat di prosesá krudo na Isla, komo pa Bullenbaai ku ta funshonando bou di un struktura entre diferente kompania pa por almasena fuel oil di Venezuela.

Bullenbaai sin duda ta bira un lokalidat importante pa via Kòrsou, Venezuela i PDVSA por logra paga nan debenan internashonal. Manera publiká ampliamente den Vigilante, Caribbean Petroleum Refinery, CRU ta trahando den un struktura sostené pa dos kompania stranhero. Ta trata di United Petroleo Corporation, establesé na Panama i KNOB Trading (SA), KTSA. Anke e struktura di Chevron pa por saka krudo for di Venezuela no ta konosí, esun di Bullenbaai i CRU ta formá kaba pa funshonarionan na Kòrsou, Panama, Venezuela i Estádos Unídos. Ta trata di un struktura di kompanianan registrá na Kòrsou tambe.

E lisensia di Chevron tin un durashon di 6 luna i ta keda prolongá outomátikamente si Chevron kumpli ku kondishonnan stipulá pa gobièrnu Estado Unidense. Segun Reuters, e outorisashon otorgá na Chevron ta pa aliviá e skarsedat di krudo krea pa e sanshonnan imponé riba Russia, durante e guera na Ukraina. Tantu Chevron komo demas kompanianan estado unidense por manda e krudo pa nan plantanan di rafinashon na kosta sùit di Estádos Unídos.

Pa lokual ta trata Kòrsou, e kompania ku a risibi derechi pa manehá Bullenbaai i Isla, Caribbean Petroleum Company ya tin su struktura pa saka krudo for di Venezuela. Segun un konseho hurídiko prosedente di e kompania na Miami Florida, InterJuris, aparte di Refineria di Kòrsou, Caribbean Petroleum Company i CRU, tin dos kompania mas envolví den e transakshon di fuel oil na Bullenbaai. 

Ta trata di Knob Trading S.A.(KTSA) i United Petroleo Corporation (UPC). E konseho di InterJuris, ta resultado di un petishon ku Caribbean Petroleum Refinery di grupo Giusti, a laga hasi riba entrega di e 600 mil bari di fuel oil na Bullenbaai. E konseho ta unu resien entrega na Caribbean Petroleum Company riba 18 di Novèmber último.

E konseho ta konkluí ku e kargamentu di fuel oil prosedente di Venezuela pa Bullenbaai riba e barku Colon no tabata kontra di sanshonnan imponé pa Estádos Unídos riba Venezuela. Segun e konseho di e abogadonan na Miami, riba 2 di ougùstùs 2022, CRU i Caribbean Petroleum Refinery BV, CPR a sera un akuerdo di entrega.  Aparte di e akuerdo menshoná, kual akuerdo a keda asertá riba 27 di sèptèmber último, tin un akuerdo adishonal. Entre CPR i Knob Trading SA tambe a sera un akuerdo pa almasena riba 24 di ougùstùs, komo un sup kontrakt.

Segun e struktura pa entrega Fuel Oil na Bullenbaai, KTSA a ofresé su servisionan na United Petroleo Coporation (UPC), kual último ta un kompania privá i ta kréditor di gobièrnu Venezolano. Segun e konseho di e abogadonan na Miami, gobièrnu di Venezuela tin un debe mionario serka UPC. E abogadonan ta sigui menshoná den e parti “splikatorio” di nan konseho ku UPC a risibi, komo un pago di debe, un kantidat di “zeta” prosedente di Venezuela. Segun e lista di kargamentu di e tènker Colon, tabata trata di 496 mil bari di (42 galon) di Fuel Oil, konsigna pa PDVSA S.A.. Colon a tuma e kargamentu na Amuay Bay na Venezuela, manera publiká pa Vigilante fo’i dia Colon a yega Kòrsou.

Login