Ayera ofisina di CIBC First Caribbean tabata e último dia ku nan tabata habrí.

Punda,– Ayera riba djabièrnè 24 mei tabata e último dia ku e ofisina prinsipal di CIBC First Caribbean tabata habrí na Kòrsou. Pa djaluna próksimo tur kuenta bankario i otro aktivonan lo sigui bou di Orcobank.

For di òktober 2023 Orcobank tabata mustrando interes pa kumpra e aktivonan di CIBC First Caribbean. Debí ku ta trata di asuntunan fiansiero, e transakshon di aktivo mester a keda aprobá dor di Banko Sentral. Sinembargo, esaki a pasa den un proseso i a keda aprobá dor di Banko Sentral riba 15 di yanüari 2024. Según Sr. Edward Pietersz, CEO i Managing Director di Orco Bank: “Miéntras e transishon signifikante aki, akshonando riba e aktivonan di CIBC FirstCaribbean na Kòrsou i Sint Maarten ta tuma lugá, nos prioridat ta keda firme – garantisá kontinuidat di servisio superior ku klientenan semper a balorá.” E ekipo di Orco Bank i CIBC FirstCaribbean ta traha huntu pa fasilitá finalisashon di e transishon aki sin interrupshon di servisio na kliente. Atkisishon di e aktivonan di CIBC FirstCaribbean ta un momentu signifikante den e trayektoria di Orco Bank.

Dem un komunikado emití na prensa direktor ehekutivo di CIBC First Caribbean, Mar St Hill, a splika ku ta for di 2021 CIBC FirstCaribbean tabata pasando den e proseso di benta di su aktivonan na kòrsou i Sint Maarten. For di 2021 ya CIBC First Caribbean a bende su akshon nan na Aruba. Segun St Hill, e benta di akshon nan ta un dje akshon nan pa CIBC First Caribbean optimalisá i simplifiká su negoshi pa asina bira mas efisiente kaminda por buta mas enfoke tambe riba su merkadonan mas importante. Na momentu ku e ehekutá tur e bentanan di akshon nan e banko riba su turno por aloká tur su atenshon pa krese e organisashon bankario i konsolidá nan posishon den e merkado.

Finalmente, St Hill a splika ku un desishon pa bandoná un merkado nunka no ta fásil, pero mesora e direktor a agregá den un komunikado na òktober 2023 ku e klientenan ku ta keda tras lo kai bou di un tim kompetente na Orcobank.  CIBC First Caribbean tabata un banko ku enfoke riba servisionan bankario personalisá. Kada kliente di CIBC First Caribbean tabata tin un “account manager” ku tabata duna servisio di kalidat pa nan klientenan.