Mirando ku tur kaso registrá di suisidio na Kòrsou e aña aki a envolvé hòmber, ta importante pa enrikesé konosementu i abilidat di nos kuerpo di polis pa por manehá kasonan asina.
Polis ta e promé ku ta keda yamá i mester respondé den kasonan trágiko, i ta krusial pa nan ta bon ekipá. Na okashon di Dia Internashonal di Hòmber, CIBC FirstCaribbean i Fundashon E Hòmber a organisá un tayer ku tabatin komo meta yudansa di kuerpo di polis den maneho di situashonnan difísil manera kasonan di intento di suisidio i fomentá asistensia mutuo durante momentunan krítiko.
Durante e tayer ku kontenido profundo, dirigí pa Sr. Elton Villareal, miembronan di kuerpo di polis a diskutí kon pa aserká i yuda personanan ku ta na punto di kometé suisidio. E tayer tabata partikularmente relevante mirando e tema pa Dia Internashonal di Hòmber 2023, ku ta enfatisá ‘Sero Suisidio di Hòmber’ i suprayá e importansia di sostené hòmber i mucha hòmbernan den maneho di nan salú mental.
Hefe di Polis Sr. Raymond Ellis a presentá un imágen bibu di e retonan ku polis ta enfrentá na momentu di trata ku situashonnan asina, enfatisando e nesesidat pa atenshon di henter e komunidat pa e problemanan aki. Sr. Ronny Cornelis, representando Fundashon E Hòmber, a suprayá e importansia di arma hòmber ku e abilidat pa nabegá e realidatnan difísil ku nan por topa. Sra. Lysaira Ortela, Marketing Manager di CIBC FirstCaribbean, a pone atenshon riba e echo ku oumento di suisidio bou di hende hòmber no ta un fenómeno úniko den nos komunidat i ta nesesario pa tin enfoke bon pensá i efektivo. E tayer tabata spesialmente pa ekipá polis, komo esun ku ta keda promé yamá, den situashonnan manera esakinan.
Sr. Elton Villareal, e fasilitadó di e tayer, tambe a trata kon e polis mester aktua den situashon kaminda un di nan koleganan ta enkontrá retonan similar. Partisipantenan a tuma parti aktivamente den e tayer, kompartiendo eksperensianan di bida real i kontribuyendo na e diálogo i interakshon. CIBC FirstCaribbean ke ekspresá su gratitut na Fundashon E Hòmber, Kuerpo Polisial di Kòrsou, i Sr. Elton Villareal pa nan kontribushonnan balioso na e programa importante aki. Ohalá ku e inisiativa kontribuí na redusí e insidensianan di suisidio entre hòmber i mucha hòmber den nos komunidat.