Desaroyo: minister Cijntje anunsiando su plannan 2023 na prensa lokal.

Parera— Minister di Asuntunan Ekonómiko, Ruisandro Cijntje ayera a anunsiá un seri di programa pa ehekutá durante 2023. Esei e la hasi durante un enkuentro ku prensa den oranan di mainta na edifisio di MEO na Parera.

Ayera durante e enkuentro  e minister a anunsiá proyektonan relashoná pa Maneho di Invershon. Esaki komo un di sinku pilar kual el a duna en detaye ayera. Den e kategoria aki, Turismo ta hunga un ròl importante. Minister Cijntje ayera a konfirmá ku Kòrsou ta bai desaroyo e área i playa di Daaibooi, dirigí pa bira un zona di “all inclusive”. Segun e minister nos mester bira manera e islanan den no área unda e sistema di tur kos inkluí a bira eksitoso. Ta bai kuminsá ku e área di Daaibooi, unda e asesibilidat na e playa ta keda pero ta bai desaroyá e infrastruktura rondó di e playa. Ya kaba a papia ku minister Charles Cooper pa desaroyo e kaminda ku ta kondusí na e playa.

Un di dos área ku Kòrsou ta bai desaroyá turistikamente ta bira Kenepa Grandi. Playa di Kenepa pa hopi aña ta den diskushon pa desaroyo. Mayoria gobièrnu ku a sinta for di 2012, tabatin plannan konkreto pa desaroyo di e proyekto i hasta e nòmber di Corallo di St. Maarten a yega di kai pa bini na remarke pa tereno. Aparte di e dos áreanan menshoná, lo desaroyá tambe áreanan di Zaquito miéntras lo sigui ku e proyektonan marítimo manera e interes pa Port of Rotterdam partisipá den CPA.

Finalmente e minister a anunsiá un proyekto di Energia Alternativa unda ku asistensha di invershonistanan hulandes lo por entre 300 pa 400 mion florin den e proyekto. Ta inisiá ku un proyekto piloto pa akapará energia di bientu pa despues firma un MOU ku Hulanda.