minister Cijntje

WILLEMSTAD – Ounke ku seguridat no ta tarea di Ministerio di Desaroyo Ekonómiko (MEO), tòg mirando ku e desaroyo di sektor di turismo ta sumamente importante pa nos ekonomia, a bin ta aloká fondo pa medio di Curaçao Tourist Board (CTB) pa pone 17 agente di seguridat, ya pa un periodo di 10 aña na tur e playanan públiko mas bishitá pa turistanan.

 I tambe a start for di aña 2013 ku e organisashon Politur pa yuda ku e tarea di protegé turista den forma preventivo i tambe servisio di ‘nazorg’ (kuido despues dje insidente), si un insidente pasa durante e turista su estadia na Kòrsou.

Minister Ruisandro Cijntje riba petishon di Parlamentario Gilbert Doran di frakshon di MFK na promé lugá a para ketu na sifranan di e kantidat di turistanan di estadia i di krusero ku ta bishitá Kòrsou. “Den aña 2022 nos a registrá 489.000 turista di estadia i den aña 2021 un total di 265.000 turista di estadia. Pues esaki ta nifiká un subida di 85%. Di òktober 2022 pa mart 2023 nos a registrá un total di 270.415 turista di estadia. Pa loke ta turista krusero nos a registrá den mesun periodo un total di 537.106 turista krusero. Esaki ta un subida di 20% pa loke ta trata turista di estadia i 106% pa loke ta turista krusero. E último 6 luna nos a haña total 807.521 turista di estadia i krusero huntu, ku ta 66% mas tantu ku e aña anterior.”

Riba e pregunta di Doran kon MEO tin pensá di atendé ku e situashon, pa asina respaldá nos turismo, Cijntje ta splika: “Naturalmente seguridat ta promé lugá un tarea ku kai bou di responsabilidat di Ministerio di Hustisia. Ounke ku esaki no ta tarea di Ministerio di Desaroyo Ekonómiko, tòg mirando ku e desaroyo di sektor di turismo ta sumamente importante pa nos ekonomia, a bin ta aloká fondo pa medio di Curaçao Tourist Board (CTB) pa pone 17 agente di seguridat, ya pa un periodo di 10 aña na tur e playanan públiko mas bishitá pa turistanan. I tambe a start for di aña 2013 ku e organisashon Politur pa yuda ku e tarea di protegé turista den forma preventivo i tambe servisio di ‘nazorg’ (kuido despues dje insidente), si un insidente pasa durante e turista su estadia na Kòrsou.” I riba e pregunta ki funshon MEO lo por hunga den prevenshon di e robonan akí, e Minister a añadí ku su ministerio huntu ku CTB a logra redusí atrako riba turistanan i kiebro den outonan di hür dor di turista, dor di agentenan di seguridat na playanan públiko i tambe dor di invertí den e organisashon Politur.

Loke CTB ta hasi ya pa hopi aña kaba ta duna sosten na turistanan ku bira víktima di atrako òf ladronisia, di manera ku nan por regla tur nan asuntunan, manera por ehèmpel un pasport via di nan respektivo konsulado. “Pero tambe regla por ehèmpel pa nan por hasi kambio di buelo si ta nesesario òf alargá nan estadia ètsetra. Pues báskamente personal di departamento di ‘product development’ di CTB ta sòru pa yuda i guia e turistanan ku haña nan den un insidente, di manera ku tòg nan por pone e eksperensia negativo un banda i sigui disfrutá di nan fakansi, i bai bèk nan pais ku un bon sentimentu pa ku nos isla.”

Doran tabata ke sa tambe kon MEO lo por yuda pa sigurá ku turistanan lo sigui bishitá nos isla, apesar di e teribel insidentenan di último tempu. Minister Cijntje: “Na promé lugá nos mester hasi nos máksimo esfuerso pa evitá ku turistanan ta haña nan mes den insidentenan desagradabel manera esakinan. Pero nos servisio di ‘nazorg’ na momentu ku tòg nan pasa den un insidente desagradabel ta duna nan e komodidat i hospitalidat ku nan meresé i asina yuda mitigá e eksperensia negativo ku nan a pasa aden. Ta hopi importante pa nan sinti ku nan ta haña debido atenshon i yudansa, antó di un forma rápido. Banda di esaki nos ta sigui promové Kòrsou komo un destinashon turístiko seif i sigur den region di Karibe.”

Segun Cijntje gabinete Pisas II no por duna niun garantia pa loke ta protekshon di balor orifinal di nos florin, pero di tur manera dor di sigui stimulá kresementu di e sektor di turismo, nos ta uda kontribuí na mantené e balor original di nos florin pa medio di entrada di divisa. Ademas ku: “Turismo ta e sektor di eksportashon mas grandi di Kòrsou, pues e fuente prinsipal di entrada di divisa pa nos isla. Si no hasi nada pa stòp e atrakonan riba turistanan, nos ta kore riesgo ku nos sektor di turismo ta kai den otro, ku tur e konsekuensianan ku esaki tin pa entrada di divisa i konsekuentemente e balor di nos florin. P’esei ta hopi importante pa nos sigui protegé e turista, kende ta esun ku ta trese e divisa pa Kòrsou. Pero tambe mester sigui krea konsientisashon bou di nos pueblo pa ku e balor di e aporte di turismo na nos ekonomia, ya asina nos tur ta mas alerta i ta duna un trato agradabel na kada turista ku ta bishitá nos pais.”