Willemstad,– Den seno di CMC tabatin reunion ayera kaminda a anunsiá algun kambio drástiko pa lokual ta trata kuido rutinario.

CMC ta anunsiá ku pa motibu di eskalashon di e situashon di Covid-19, Curacao Medical Center ta kanselá tur operashon di awe djaluna 21 di mart i mañan djamars 23 di mart ku no ta relatá na un emergensia.

Pashèntnan lo risibí yamada di departamentu di planifikashon di CMC pa traha un otro sita. CMC lo hasi un anunsio promé, si lo mester kanselá tur otro operashon di e siman aki. Tur sita na poliklínika si ta sigui normal.

Te ku ayera atardi e kantidat di pashèntnan infektá ku Covid-19 a yega na un total di 23, di kual 11 ta den kuido intensivo i 12 ta den departamentu di Covid-19. Di e 23 pashèntnan, kuater (4) ta di Boneiru pa motibu ku Kòrsou a ekstendé ayudo na nos hermana isla Boneiru, ku no por akapará tur nan pashèntnan di Covid-19 den nan hòspital.

E oumento di kasonan a pone ku departamentu di Kuido intensivo mester a bira kompletamente dediká na Covid, miéntras pashèntnan di kuido Intensivo ku no ta relatá na Covid a wòrdu trasladá pa departamentu di kurason (CCU).

Spesialistanan a tuma nota di un oumento di pashèntnan mas yòn entre edatnan di 30 pa 40 aña, kual no tabata e kaso mas promé. Esaki posiblemente ta debí na un resultado di e variante nobo kual ta esun britániko.

CMC a tuma nota tambe ku hopi pashènt infektá ku Covid, ta akudiendo na sala di Emergensia sin tuma kontakto ku nan dòkter di kas promé. CMC ta supliká komunidat pa tuma kontakto ku nan dòkter di kas si botin síntoma di Covid i no bini departamentu di Emergensia sin ku esaki ta nesesario pa asina evitá plamashon. Dòkter di kas lo avisá si mester bai emergensia i lo asistí den e proseso si dado kaso e pashènt tòg mester bai departamentu di Emergensia.

Si bo ta kalifiká pa risibí bo bakuna por fabor traha bo sita via www.bakuna.cw pa asina yuda protehá nos komunidat.