Back to Top
Responsive image
E korant di pueblo

CMC ta yega 45 pashènt ku Covid: situashon hopi serio


March 25, 2021 • 2 minüt pa lesa

Otrobanda—Chèns ta hopi grandi ku pa djaluna próksimo òf durante otro siman, Curacao Medical Center ta yega su kapasidat pa trata pashèntnan ku Covid. Segun Relashonista Públiko, Germain Gibbs, durante último dia e kantidat di pashènt ku Covid a bira hopi mas tantu i ta planeando pa habri mas departamento pa por akapará esnan ku yega CMC.

Segun Gibbs, e situashon ta hopi serio. Te ku djarason tabatin 38 pashènt ku Covid den CMC i djaweps  mainta e kantidat a bira 43 bayendo mas ariba. Durante hinter dia tin hende ta drentando kuido intenso kual entretantu ta yen. E departamentonan di estadia korto i di AOA tambe ta yen. Den oranan di mainta a kuminsá plania pa habri mas kupo di e departamento di PAS pa einan tambe bira un sekshon di Covid. Pa por habri PAS, ta tuma tempu pasobra mester adaptá e ventilashon dje departamento konforme protokolnan di Covid. Pa den oranan di atardi PAD tambe ta bira un departamento di Covid.

Aparte di ampliashon di kapasidat a harma un tènt “hospitario” manera Vigilante a relatá e siman aki. Segun presidente di e Outbreak Team na CMC, dr Koeyers ta trata di un tènt ku tabata na St. Maarten pero no a wòrdu utilisá. E tènt na e momentonan aki ta harma pafó di CMC. E tènt no ta un departamento di Covid sino un pre registrashon di pashènt pa nan no drenta CMC i kontaminá e kompleho.

Segun Gibbs a sigui relatá tin hende hóben tambe drentando. “Ayera mes na momento mi tabata den departamento di emergensha mi a mira hende hóben drenta di apénas 25 aña. E relashonista públiko a hasi un yamada serio na komunidat pa kuida i tene nan mes na e reglanan i trata na partisipá mas lihé posibel na e proseso di bakunashon. Gibbs a bisa e oumento a bai hopi lihé. Siman pasá tabatin 9 persona ku Covid den CMC. Djaweps mainta e kantidat a yega 43. Esei segun Gibbs ta sin e impakto di elekshon. Ku e departamento di PAS tin un kapasidat di kasi 70 pashènt. Esei ta nifiká si mester amplia lo nifiká mester sera otro departamento pa alokashon di Covid. E hospital tin 300 kama, pero no ta tur por bai pa Covid sino no por duna otro tratamentunan



Login