WILLEMSTAD—- Habitantenan di  Parera ta man na kabes ku kantidat di shushi ku a bin ta aglomerá den nan bario i ta hasi un súplika pa yudansa.

 For di dia kandela a destruí algun kas den e bario di Parera pa ta mas eksakto Cocowijk e plenchi bashí a para bira un sentro pa dùmp shushi. Habitantenan di e bario ta sumamente prekupá kon dia pa dia kosnan ta birando den e bario. A para bira awor ku e plenchi bashí unda e kasnan tabata promé ku nan kima a bira  e aria pa dùmp shushi. Despues ku kandela a destruí e tres kasnan  a desmantelá esakinan pero a laga tur e palunan bola atras tresiendo un mahos bista. Den serkania tambe tin un kura unda ku a para bira un kustumber kaminda ta tira shushi. E kura aki ta yena ku tur sorto di shushi kual ta trese kantidat di bestia den e bario entre nan djaka i kakalaka.

A aserka diferente instansha pero nan ta bisa ku e kura tin un doño pa kual nan no por hasi nada debí ku esei no ta tereno di Gobièrnu. Enbèrdat ta trata di un kura ku tabatin  su doño  ya ku esaki  pa un tempu ya no tei mas debí ku e la fayesé. No ta konosí ken ta su famianan ku por wòrdu aserka pa limpia e tereno. E habitantenan di e bario ta súplika e instansha ku por duna nan un man pa asina por limpia e tereno pa nan tambe den e bario por haña un alivio.