Back to Top
Vigilante banner image

COHO ta enserá mil mion florin na invershon


June 23, 2021 • 2 minüt pa lesa

Raymond “Monchi” Gradus ayera na Marriott. Su presentashon no a trese nada nobo bou di solo pa lokual ta trata e desaroyonan finansiero di Kòrsou.

Piskadera—Segun presidente di Hunta di Supervishon Finansiero, Cft, COHO ta enserá un programa di 457 mion Euro ku ta surpasá mil mion florin destiná pa islanan Aruba, Kòrsou i St. Maarten. Esaki ta ekskluí por lo ménos 822 mion florin adishonal na Fondo di Sosten pa Kòrsou.

Esaki ta lokual a bini dilanti ayera na Marriott Hotel durante diskurso di prof. dr. Raymond Gradus. Ayera Gradus a konsentrá su presentashon rondó di e situashon finansiero ekonómiko promé i despues di Covid. Sin tabata un sorpresa, Covid tabatin impakto grandi riba finansas públiko na Kòrsou. Esaki a rekerí sosten finansiero di Hulanda den forma di fiansanan pistolero sin interes. Ayera Gradus no tabata kier a bai den detaye kuantu dje fiansa lo transformá den forma di opsekio.  “Esaki ta un desishon polítiko e la duna di konosé”.

Entretantu a Sali na kla tambe ku Hulanda ta dispuesto na invertí mil mion florin den islanan Kòrsou Aruba St. Maarten.  Pero pa Kòrsou, aparte di sèn pa invertí, segun Gradus tin plania sosten na likides tambe ku por yega 822 mion florin adishonal. Pero e sosten di likides alabes ta hinka Kòrsou den un problemátiko di debe grandi. Anke no tin un sifra spesífiko, ta kalkulá e debe nashonal na 3.8 mil mion florin (3.8 bion). Hulanda ta eksihí na mira mas detaye riba struktura i kontenido di e debe.

E debe aktual segun presentashon di Gradus a krese for di 2010. Despues di e restrukturá na 2010, a keda atras un debe di 1.7 mil mion florin. E bolsa aki a wòrdu transformá den fiansa pistolero kual promé parti a kaduká na òktober 2020, pa 80 mion florin. Hulanda a bolbe transformá e bolsa di repago den un fiansa di 15 aña. Mas Kòrsou sigui risibi sosten finansiero fo’i Hulanda mas grandi e debe nashonal ta krese. Ya pa 2020 i 2021 ta bini aserka kasi 840 mion florin foi un debe nashonal total ku tabata kasi 3 bion florin. Hulanda ta pensá na stòp e sosten di likides na 2022.  I pa por kanselá e debenan segun Gradus mester bini un planifikashon di fecha i tèrmino.

Pero pa por sigui fia Kòrsou sèn, Hulanda ke mira gobièrnu baha su kostonan. Por lo ménos 20% en total kual mesora mester atendé ku e salarionan di ámtenar. Kòrsou ta paga mensual kasi 22 mion florin na salario neto i pro medio entre 42 pa 52 mion florin mensual na salario brutu inkluso kondishonnan sekundario.

Login