Alexandra van Huffelen: e sekretario di estado nobo, lo kometé mesun fayo ku su antesedentenan, Ronald Plasterk (2010) i Raymond Knops (2018). Diseñá lei riba papel, sin trayekto di ehekushon organisatorio.

Otrobanda—E Leinan di Konsenso implementá na 2010, nunka no konsiderá e parti organisatorio durante nan ehekushon. Pa tal motibu, ningun di e 5 leinan no a logra drecha ni e maneho finansiero pero tampoko e maneho hudisial na Kòrsou. For di 2010 Kòrsou su debe a oumentá ku kasi 3 miar florin miéntras prizon a keda mesun yen ku sifranan di krímen mas haltu. COHO, tambe ta un Lei di Konsenso i lo faya riba mesun pista ku su antesedentenan.

En realidat, ni Hulanda i tampoko Kòrsou no tabatin tempu pa kontrolá ehekushon di e Leinan di Konsenso. De fakto, mayoria di esnan ku awe ta hunga eksperto riba Leinan di Konsenso, no sa di unda i ki dia uzo di e terminologia “konsenso” a kuminsá den Reino Hulandes.  E promé biaha ku e Leinan di Konsenso a subi mesa di negosiashonnan entre Kòrsou i Hulanda,  tabata durante un konferensha entre konseheronan i polítikonan di Kòrsou i nan “sosionan” den Reino. Spesífikamente ta papiando di 29 i 30 di òktober 2007 na Utrecht durante un kumbre di preparashon pa e konstitushon nobo den Reino Ulandes. Einan, despues ku Gobièrnu di Kòrsou a kai pa firmamentu di un “slotverklaring”, e ulandesnan, konsehá pe sabio den Reino, Hirsch Ballin, a introdusí un terminologia nobo nunka bisto den negosashon di Reino. E diabóliko palabra “consensus ” a subi mesa. Einan, Ulanda a splika e sobra “konseheronan” den Reino ku por tin konsenso den Reino pa yega na un solushon. Pero pa por tin konsenso, mester tin lei. Anto di netamente einan e terminologia “Lei di Konsenso” a bini. E meta final di Ulanda tabata pa changa Kòrsou i sobra sosionan den minoria dor di bisa ku “ta bosnan mes a firma konsientemente” pa kai bou di e leinan. Esaki a nifiká ku pa promé biaha den istoria, Leinan di Konsenso a bira èrmènt di negoshashon. Pero en realidat e leinan a bira un ambishon propio di korupshon entre polítikonan i nan konseheronan ku finalmente a bin resultá den e último rosea di Kòrsou komo Pais Outónomo den Reino. Kòrsou a tuma e Leinan komo “sufrimentu bou di krédito despues ku Ulanda a logra kombensé nos negoshadónan di tuma un saku yena di promesanan pa sèn.

Despues di a kumbiní na òktober 2007, ku “Konsenso” lo bira pa futuro, e tèrmino di koperashon den Reino, gobièrnunan a sali fo’i punto di bista ku mester tin konsenso durante e trayekto di formashon di e Leinan. Nan ta papia di konsenso den “forma i kontenido”. Tur super eksperto den Reino a lubidá riba ehekushon di e leinan. Ku otro palabra e konsenso no ta solamente presente durante e trayekto di formashon, sino tambe durante e trayekto di ehekushon. E konsenso den Reino, mester tabata infinito i kontinuo.   E problema ta unu simpel pa komprondé. No por supervisá e leinan sin kontròl organisatorio. A largo plaso no ta e ekspertonan ku a diseñá ta ehekutá e leinan sino e aparato públiko i su ámtenarnan. Te ainda Kòrsou a konosé dos diseño riba Leinan di Konsenso, Finansiero i Hudisial. COHO ta un forma “hibrido” ku ta bai mas den un Lei di Konsenso Organisatorio.

Riba e Lei di Konsenso Supervishon Finansiero, falta di organisashon rondó di Maneho Finansiero, ta unu dje faktornan ku Kòrsou no por kumpli ku eksigensha nan imponé pa e lei. Presidente di Cft, Raymond Gradus a konfirmá esaki tambe durante un rueda di prensa na 2018.  Segun Gradus, organisashon, por ta unu dje faktornan ku ta stroba e maneho finansiero sano na Kòrsou. Gradus su kontesta ta kuadra kompletamente ku realidat. Diseño di e Leinan di Konsenso, tantu esnan hudisial komo finansiero a kuminsá for di 2007. Despues di 3 aña di planifikashon, na yüli 2010 nan a keda ofisialisá komo Leinan den Reino. Durante planifikashon di e leinan i nan ehekushon, nunka niun eksperto no a pensa riba “implementashon”. I pa implementá un lei, kual ta rekerí kambio nan den organisashon, mester diseñá e parti aki tambe. Tantu den 4 leinan hudisial, Polis, Ministerio Públiko, Korte i Mantenshon di Órden, ningun di e órganonan envolví no a yega e metanan stipulá. Por lo ménos 50% of mas di e leinan no a wòrdu ehekutá. Un ehèmpel fiho, ta e sekshon di “GVP” den e Lei di Konsenso di Polis. Kisas e mihó prueba pa uza kontra di e Leinan di Konsenso ta di esun Finansiero. Despues di 12 aña ehekutando e Lei Finansiero, Kòrsou su debe na Hulanda a yega na mesun nivel ku na inisio di 2010, 4 miar florin. COHO, e forma hibrido den e Leinan di Konsenso., tambe lo faya pa mesun motibunan.