Epidemiológo Dr. Izzy Gerstenbluth.

PUNDA- Gastunan di kuido médiko pa personanan ku ta keda hospitalisá pa motibu di infekshon ku Covid-19 ta forma un suma èkstra riba e gastunan regular di hospitalisashon.

Segun epidemiólogo lokal, Dr. Izzy Gerstenbluth, e pandemia di Covid-19, inkluyendo e último ola kousá pa e variante Delta, tin un impakto grandi riba ekonomia di Kòrsou.

Kada tratamentu pa un pashènt ku Covid-19 ta trese gastunan èkstra kuné. Motibu pa esaki ta ku hospitalisashon dor di Covid-19 ta rekerí trato na un manera isolá kual ta eksigí mas mas material i personal médiko. Ademas, personanan ku mester risibí kuido intensivo ta rekerí un otro tipo di funshonamentu i personal médiko spesialisá.

Kuido general pa pashèntnan infektá ku Covid-19 na CMC ta kosta mas o ménos 2.865 florin pa dia èkstra riba e gastunan general di hospitalisashon. Gastunan di kuido intensivo ta mas o ménos 5.508 florin pa dia adishonal riba e gastunan general. Si kalkulá e total di hospitalisashonnan for di komienso di e pandemia te ku awor e gastunan èkstra pa motibu di kuido na personanan infektá ku Covid-19 ta forma un suma ku ta surpasá 13.5 mion florin.

Apesar di tur otro kos ku e pandemia di Covid-19 a trese kuné, malesa severo i hospitalisashon pa motibu di infekshon ta kostando hopi sèn di kual kada un persona di nos poblashon mester karga, esaki Dr. Gerstenluth a duna di konosé.

Ademas, Dr. Gerstenbluth ta anunsiá ku banda di e gastunan haltu ku kuido pa pashènt ta trese kuné e personalnan médiko di CMC ta trahando bou di un preshon inmenso. Konsekuensia di esaki ta ku e personalnan ta agotá, kual por mira den e kantidat di persona ku ta “mèldu ziek” último temporada.