Oumentá: Segun eks Sekretario General di Finansas Zus de Lannooy, Covid a afektá likides di gobièrnu. Riba e foto huntu ku minister Javier Silvania

Punda- Gastunan relashoná ku Covid te ku yüni 2021  kosta Kòrsou 160 mion florin. Esaki ta lokual Sekretario General di Finansas Públiko Ersilia “Zus” de Lannooy  duna konosé ayera durante un rueda di prensa na Fòrti Amsterdam. E eksperto kende a duna un bon presentashon a mustra e sifranan konfirmá via di un tabèl unda por a mira e gastunan mensual relashoná ku Covid na Kòrsou.

Ehèmpelnan di gastunan relashoná ku Covid 19 ta e.o., Trabounan adishonal, gastunan di bakunashon i personal adishonal komo por ehèmpel médikonan internashonal ku a bin yuda (AMI). E gastunan aki no tabata presupuestá i ta kousa problema pa e posishon di likides di gobièrnu. “Tin dia nos tabata haña kuentanan di 400 mil florin”, de Lannooy a duna di konosé ayera.

Segun presupuesto ta revelá, despues di Yüni e gastunan ta sigui i yega na un total di 286 mion florin. Konsiderando ku e défisit na final di 2021 ta wòrdu programa  entre 506 mion pa 561 mion florin, por konkluí ku e gastunan relashoná ku Covid tin hopi peso riba e likides di gobièrnu.