Back to Top
Responsive image
E korant di pueblo

Covid lo sigui hinka Kòrsou profundo den debe ku Hulanda


January 12, 2021 • 3 minüt pa lesa

Promé Minister Eugene Rhuggenaath ayera durante rueda di prensa huntu Izzy Gerstenbluth.

Punda–  E problemátika di Covid tei sigui hinka Kòrsou profundo den debe ku Hulanda i tambe oumentá e debe nashonal. Segun Promé Minister Eugene Rhuggenaath, mester wak bon kiko Hulanda ta bai hasi den kuadro di transformá parti di e debe di Kòrsou den un opsekio.

Pa lokual ta trata finansiamentu pa kubri efektonan di Covid, Hulanda a fia Kòrsou te ainda un suma di 670 mion florin èkstra. E último empuhe finansiero di Hulanda a trese e debe di Kòrsou na Hulanda te na 3 mil mion florin (3 Miar). E debe nashonal en total di Kòrsou ta bira kasi 3.8 miar florin total i mas fia, mas mester bai paga.

Eugene Rhuggenaath a duna di konosé ayera ku ainda Hulanda i Kòrsou no a yega na un areglo riba e pagonan. E Promé Minister ta spera ku parti dje fiansa lo keda transformá den  un opsekio. Si esei no sosodé, yunan di Kòrsou mester bai paga mas impuesto. Tur esakinan lo dependé riba kontenido di e Pakete di Pais kual pa final di yanüari próksimo lo drenta na vigor den e promé fasenan.  Ehekushon di e Pakete di Pais tin bentaha di desbentaha kual gobièrnu di Kòrsou no ta splikando na kontenido. Manera menshoná Hulanda te ainda a fia Kòrsou 670 mion florin, pero tin konsekuenshanan severo mará na e fiansa. Segun Rhuggenaath pa finalnan di yanüari, mayoria dje kambionan mester ta ehekutá, faltando apénas 3 siman. Hulanda ta bai sigui duna sosten di likides. For dia aprel di e aña aki tin spekulashon ku Hulanda i Kòrsou ta tratando na kambia e Akuerdo di Kresementu ku a faya den un Pakete di Pais ku muchu mas detaye aden. Raymond Knops, Eugene Rhuggenaath komo Steven Martina no por a duna niun detaye ki direkshon òf kon lo bai na un ERA nobo pa Kòrsou den sifra.

Pa otro luna ta spera ku Hulanda manda un di kuater bolsa di fiansa. Ta kalkulá e suma aki di ta entre 250 pa 300 Mion florin. E suma lo oumentá e debe ku Kòrsou tin na Hulanda i segun Promé Minister Rhuggenaath no tin un akuerdo ainda riba e tèrmino di e fiansanan. Ta bon pa menshoná tambe ku Hulanda den pasado a forma pakete di fiansa kual un parti tabata opsekio, un parti fiansa pistolero unda ta paga e kota kompleto riba un fecha sin interes miéntras un otro parti ta den forma di anuidat, esta repago ku interes.

Na e momentonan aki segun sifranan di Cft, Kòrsou a paga durante 2020 un suma di 100 mion florin na fiansa. Promé ku Covid, manera menshoná den diferente artíkulo, e debe na Hulanda tabata 2.4 miar florin kual algun ta prosedente for di 2010 despues di restrukturashon. Knops e aña aki a anunsiá ku Kòrsou no mester paga un parti di e debe aki sino lo alargá e tèrmino den mas aña. Entre otro, un suma di 82 mion florin ku Kòrsou mester paga pa 2020, lo wòrdu transformá den un fiansa di 15 aña sin interes miéntras tambe a bini 286 mion florin adishonal na Novèmber  pa finansiá e di tres tranche den programa di NOW i Fondonan di Sosten. Esaki ta lokual por konkluí den un kalkulashon di CFT.  15 di òktober último, Kòrsou mester a paga Hulanda bek un suma di 82 mion florin. Ta trata di un fiansa pistolero kual e suma mester wòrdu pagá bek den un pago. Segun Knops , ta bai transformá e fiansa aki den un fiansa den 15 aña sin interes. Orígen di e fiansa no ta konosí pero na 10-10-10, Hulanda e Kòrsou a kumbiní pa transformá un suma di 1.7 miar florin den obligashon kual 100 mion mester paga na 2020.

Login