Back to Top
Vigilante banner image

Covid ta obligá islanan den Karibe Hulandes restringí entrada di pasahero


July 20, 2021 • 3 minüt pa lesa

Debí na oumento di kasonan di infekshon kousá pa variante Delta,
diferente isla di Karibe Hulandes a eskalá medidanan di biahe

PUNDA- Den e temporada aktual di fakansi grandi, hopi hende lokal ta biaha pa eksterior i turistanan posiblemente ta biaha pa Kòrsou. E biahamentu den e temporada aki por trese rísikonan grandi kuné pa paisnan den Karibe, pa e motibu aki diferente isla karibense a eskalá medidanan stipulá pa redusí riesgo di importashon di e variante Delta.

Manera ya ta konosí último simannan e variante Delta no ta solamente e variante ku ta afektando paisnan afó, pero tiki tiki e variante a yega serka na paisnan rondó di nos i asta a keda detektá na Kòrsou. Pa prevení ku e variante Delta ta drenta masal via biaheronan, diferente isla den Karibe, inkluso Kòrsou, a opta pa eskalá algun medida pa loke ta trata reglanan pa ora ta drenta i sali e pais.

Kòrsou
Den rueda di prensa ku a tuma lugá siman pasá, outoridat lokal a anunsiá ku Kòrsou a pone Hulanda riba lista di paisnan ku ta keda kategorisá komo pais di riesgo hopi haltu. Motibu pa esaki ta ku aktualmente Kòrsou ta risibí aproksimadamente 1000 pasahero pa dia for di Hulanda/Oropa. Ademas, ta konosí ku 84% di e kontagionan aktual na Hulanda ta serka personanan no bakuná. A base di e informashon aki, Gobièrnu di Kòrsou a pone pa medida ku tur persona ku ta biaha for di Hulanda mester hasi un PCR tèst máksimo 72 ora promé ku buelo i tambe un tèst di antígeno 3 dia despues di yegada na Kòrsou. E medidanan a drenta na vigor for di ayera djaluna 19 di yüli 2021.

Pa personanan ku resultá positivo pa Covid-19, sea na yegada òf durante estadia, un obligashon di 10 dia den isolashon na sitio di hospedá a keda stipulá.

Aruba
Dia 16 di yüli, tim di krísis di Aruba a publiká desishon di kambionan tumá ku ta drenta na vigor entrante 17 di yüli 2021. Pa Aruba ta konta ku tur persona, sea residente òf turista, ku ta biaha pa Aruba for di un pais ku ta keda kategorisá komo riesgo haltu, mester hasi un PCR tèst sea 72 ora promé ku biahe òf na yegada na Aruba. Pa esnan ku hasi e PCR tèst na yegada, mester keda den karentena en espera di e resultado apesar si e persona ta bakuná si òf nò.

Boneiru
Segun anunsio di outoridat na Boneiru entrante djasabra 17 di yüli, nan lo distinguí kuater nivel di riesgo pa paisnan. Boneiru tambe a añadí Hulanda na lista di paisnan ku riesgo masha haltu entrante 19 di yüli 2021. Pa loke ta trata medidanan pa biahamentu ta konta lo siguiente. Habitantenan kompletamente bakuná di e islanan ABC (Aruba, Boneiru i Kòrsou), no mester hasi tèst di PCR ni tèst antigéniko ora ta biaha entre e islanan. Sinembargo, e biaheronan aki mester yena deklarashon di salú sí di nan destinashon.

Habitantenan di e islanan ABC ku no ta bakuná i ta biaha entre e islanan, mester hasi un tèst di PCR máksimo 72 ora promé ku yegada na Boneiru. Ademas mester yena e deklarashon di salú di nan destinashon.

Sint Maarten
Manera nos a publiká ayera, Sint Maarten a pone Kòrsou huntu ku Islanan Vírgen Britániko, Maroko i Oustralia riba lista di paisnan ku riesgo haltu debí na e oumento rápido di e variante nobo.

Tur persona ku ta biaha, sea bakuná òf nò, ku ta bini for di un pais kategorisá komo riesgo haltu mester hasi un PCR tèst máksimo 72 ora promé ku buelo. Sint Maarten no ta aseptá ningun tèst antígeno komo prueba di pasaheronan di paisnan di riesgo haltu. Pa loke ta trata biaheronan for di Merka i Canada, un tèst di PCR máksimo 72 ora promé ku buelo òf un tèst di antígeno 48 ora promé ku buelo ta rekerí pa por drenta e pais.


Sint Eustatius
Publikashon riba wèpsait di Gobièrnu di Statia, ta duna di konosé ku Boneiru, Kòrsou, Sint Maarten i Hulanda ta kategorisá komo paisnan di riesgo haltu.

Pa biaha pa Statia outoridatnan ta eksigí un PCR tèst negativo tumá máksimo 72 ora promé ku buelo. Esaki ta konta pa biaheronan di pais ku riesgo abou, haltu i hopi haltu. Pa personanan ku un biahe di ménos ku 48 ora, máksimo estadia di 2 anochi, no ta nesesario pa hasi tèst ora di bai bèk. Karentena mandatorio por ta aplikabel, dependé di e pais ku a bishitá promé ku yegada na Statia. Personanan no bakuná ku ta biaha pa e isla mester tene karentena di 10 dia asina ku yega e pais. Personanan bakuná ku ta biaha for di pais kategorisá ku riesgo haltu mester tene karentena di 5 dia.

Login